चन्द्रनिगाहपुरमा बस दुर्घटनामा १२ जना यात्रु घाइते

जनकपुरधाम, कार्तिक २७ गते ।  पोखराबाट जनकपुर जाँदै गरेको यात्रुबाहक बस रौतहटको चन्द्रनिगाहपुरमा दुर्घटनाग्रस्त हुँदा १२ जना यात्रु घाइते भएका छन्। जिल्ला प्रहरी कार्यालय रौतहटका अनुसार, आज बिहान चन्द्रपुर नगरपालिका-२, लचका नजिक पूर्वपश्चिम लोकमार्गमा ग.१ ख.५८०७ नम्बरको बसले बाटो काट्दै गरेको स्याललाई बचाउन खोज्दा दुर्घटना भएको हो। बसमा २० जना यात्रु सवार थिए, जसमा १२ जना घाइते भएका छन्।

दुर्घटनापछि बस चालक दोलखा सैलुङ गाउँपालिका-८ निवासी ३५ वर्षीय पदम बहादुर बस्नेत र सहचालक बाराको करैयामाई गाउँपालिका-७ निवासी ३० वर्षीय सुरज पौडेललाई प्रहरीचोकी पौराहीले नियन्त्रणमा लिई थप अनुसन्धान गरिरहेको जनाएको छ। घाइतेमध्ये एकजनाको अवस्था गम्भीर छ भने तीन जनाको मध्यम र अन्य आठ जनाको सामान्य चोट लागेको छ। उनीहरूको उपचार विभिन्न अस्पतालमा भइरहेको प्रहरीले जानकारी दिएको छ।