जाजरकोटमा गाडी दुर्घटना, २८ जना घाइते

काठमाडौं, कार्तिक २६ गते ।  भेरी नगरपालिका–७ स्याउली बजारबाट नेपालगन्जका लागि छुटेको बा ५ ख १८९२ नम्बरको फोर्स गाडी भेरी नगरपालिका–१३ कुदु जिरो प्वाइन्टनजिक दुर्घटना हुँदा २८ जना यात्रु घाइते भएका छन्। जिल्ला प्रहरी कार्यालयका सूचना अधिकारी दिनेश तिमिल्सेनाका अनुसार स्याउली बजारबाट यात्रु लिएर नेपालगन्जतर्फ जाँदै गरेको उक्त गाडी दुर्घटनामा परेको हो।

घटनास्थलमा जगतीपुर प्रहरीले २१ जना यात्रु ईन्ट्री गराए पनि बीच बाटोमा थप यात्रु चढेको अनुमान गरिएको छ। दुर्घटनामा सवार ४ जनाको अवस्था गम्भीर रहेको छ भने अन्यलाई सामान्य चोट लागेको छ। घाइतेहरूको कुदु स्वास्थ्य चौकीमा प्राथमिक उपचारपछि जाजरकोट अस्पतालमा थप उपचारका लागि पठाइएको छ। गाडी मोडमा अनियन्त्रित भई करिब ६० मिटर तल खसेको प्रहरीको भनाइ छ।