वीरगन्जमा तीन ठाउँमा रक्तदान कार्यक्रम सम्पन्न, २४४ पोका रगत सङ्कलन

वीरगन्ज ,कार्तिक ११ गते ।  वीरगन्ज महानगरपालिकामा आज बिहान तीन स्थानमा रक्तदान कार्यक्रम आयोजना भएको छ। यसअन्तर्गत, क्रियाशील युवा पत्रकार मञ्च नेपालले शुभ दीपावली र छठ पर्वको अवसरमा वीरगन्जको घण्टाघरमा खुल्ला रक्तदान कार्यक्रम आयोजना गर्यो। उक्त कार्यक्रममा ६ महिलासहित ५१ जनाले रक्तदान गरेका थिए। रक्त सञ्चार केन्द्र पर्साका अनुसार शनिबार सम्पन्न तीन कार्यक्रमहरूमार्फत कुल २४४ पोका रगत सङ्कलन गरिएको छ।

वीरगन्ज महानगरपालिकाका अन्य क्षेत्रमा पनि आज रक्तदान कार्यक्रम आयोजना गरियो। वडा नम्बर १३, राधेमाईस्थित नेपाल निर्माण व्यवसायी संघ पर्साले आयोजित कार्यक्रमबाट ३ महिलासहित १६१ जनाले रक्तदान गरेका थिए। त्यसैगरी, वडा नम्बर १७, अलौंस्थित युनिभर्सल युनाइटेड क्लबले पनि रक्तदान कार्यक्रम गरेको थियो, जसमा ४ महिलासहित ३२ जनाले रक्तदान गरेका थिए।