रौतहटमा लामो समयदेखि फरार रहेका ६ प्रतिवादी पक्राउ

जनकपुरधाम, कार्तिक २ गते ।  नेपाल – रौतहट जिल्लामा लामो समयदेखि फरार रहेका ६ जना प्रतिवादीलाई प्रहरीले पक्राउ गरेको छ। जिल्ला प्रहरी कार्यालय रौतहटका प्रवक्ता दीपकुमार रायका अनुसार, यी सबैलाई अदालतबाट फैसला भइसकेपछि कैद र जरिबाना तोकिएर फरार रहेका थिए। पक्राउ परेकाहरूमा नजिर अन्सारी, सिहदान्त पासवान, रामसागर गिरी, पवनकुमार राउत कुर्मी, अखिलेशकुमार यादव र राजेशकुमार यादव रहेका छन्। उनीहरूलाई दसैंको अवसरमा घर आएका बेला पक्राउ गरिएको हो।

डीएसपी रायका अनुसार, अन्सारीलाई ज्यान मुद्दामा, पासवानलाई चोरी मुद्दामा, गिरीलाई बालबिबाह मुद्दामा, कुर्मी र अखिलेशकुमार यादवलाई चोरी मुद्दामा कैद र जरिबाना तोकिएको थियो। त्यस्तै, राजेशकुमार यादवलाई लागुऔषध मुद्दामा ५० हजार जरिबाना तोकिएको थियो। पक्राउ परेका सबै प्रतिवादीलाई बिहीवार जिल्ला अदालत गौरमा उपस्थित गराई फैसला कार्यान्वयनको प्रक्रिया अघि बढाइएको छ।