बडादसैंमा ६३ हजारभन्दा बढीले त्रिभुवन विमानस्थलबाट हवाई यात्रा

काठमाडौ, असोज २७ गते । बडादसैंका दुई दिनमा त्रिभुवन अन्तर्राष्ट्रिय विमानस्थलमार्फत ६३ हजार दुई सय ४२ जनाले हवाई यात्रा गरेका छन्। असोज २४ र २५ गते आन्तरिक तथा अन्तर्राष्ट्रिय दुबै उडानबाट यी यात्रुहरूको आवतजावत भएको हो। विमानस्थलका प्रवक्ता रिन्जी शेर्पाका अनुसार, आन्तरिकतर्फ असोज २४ मा १७ हजार तीन सय २९ र असोज २५ मा १४ हजार चार सय ३६ यात्रुले उडान गरे, जसमा तीन सय एक र दुई सय ७८ उडान समावेश थिए।

अन्तर्राष्ट्रिय उडानतर्फ असोज २४ र २५ गते ३१ हजार चार सय ७७ यात्रुले यात्रा गरे। यस अवधिमा एक सय सात उडान दुवै दिन सञ्चालन भए। यसअघि असोज १४ मा एकै दिन पाँच सय ५९ उडान भएका थिए, जसमा ३५ हजार सात सय ४ यात्रुले यात्रा गरेका थिए। बाढी पहिरोले सडक सञ्जाल अवरुद्ध भएपछि हवाई यात्रामा चाप बढेको भए पनि अहिले हवाई उडान सामान्य बन्दै गएको विमानस्थल कार्यालयले जनाएको छ।