रुख ढल्दा नारायणगढ–मुग्लिन सडक अवरुद्ध

चितवन, ,भदौ १६ गते । भरतपुर महानगरपालिका–१ आँपटारीमा आज बिहान एक रुख ढल्दा नारायणगढ–मुग्लिन सडक अवरुद्ध भएको थियो। जिल्ला प्रहरी कार्यालय चितवनका प्रहरी नायब उपरीक्षक भेषराज रिजालका अनुसार, रुखलाई पन्छाएपछि सडक पुनः सञ्चालनमा आएको छ। यो घटनाका कारण सडकमा केही समय यातायात प्रभावित भएको थियो। यसैबीच, नारायणगढ–मुग्लिन सडकखण्डमा बस र ट्रक आपसमा ठक्कर खाँदा तीनजना घाइते भएका छन्। भरतपुर महानगरपालिका–२९ सिमलतालमा एआर०१टी ६३७२ नम्बरको भारतीय बसले ग२ख ११०८ नम्बरको ट्रकलाई ठक्कर दिएपछि दुर्घटना भएको हो। घाइतेहरूको अवस्था मध्यम रहेको छ, र उनीहरूलाई तत्काल उपचारका लागि अस्पताल पुर्याइएको छ। त्यसैगरी, सोही सडकखण्डमा तीनवटा सवारीसाधन एकापसमा ठक्कर खाएका छन्। भरतपुर महानगरपालिका–२९ जुगेडीमा मुग्लिनबाट नारायणगढतर्फ आउँदै गरेको बा११च ८२६२ नम्बरको सफारीले रोकिराखेको बागमती प्रदेश०३–००१च १७७० नम्बरको जिप र ग२च ४४३६ नम्बरको जिपलाई ठक्कर दिएको छ। ठक्करबाट तीनवटै सवारीसाधनमा क्षति पुगेको र घटनाको थप अनुसन्धान भइरहेको प्रहरी नायब उपरीक्षक रिजालले जानकारी दिएका छन्।