कलर्स एफएमले मनायो पाँचौं वार्षिकोत्सव, अनलाइन टिभी र पोर्टल स्थापना गरेर मिडियामा नयाँ अध्याय

जनकपुरधाम, भदौ ८ गते।जनकपुरधामबाट सञ्चालनमा रहेको कलर्स एफएमले आफ्नो पाँचौं वार्षिकोत्सव एक विशेष समारोहका साथ मनायो। यस अवसरमा विभिन्न वक्ताहरूले मिडियाको विकास र यसका चुनौतीहरूको विषयमा गहन चर्चा गरे। वक्ताहरूले विज्ञापनमा ५० प्रतिशतभन्दा बढी कमिसन स्थानीय तहका कर्मचारीहरूद्वारा लिइने गरेको विषयमा चिन्ता व्यक्त गर्दै, मिडियालाई यस्ता कमिसनको प्रवृत्तिलाई रोक्न आग्रह गरे।कलर्स एफएमका अध्यक्ष रुपेश सिंहले संस्थाको प्रगतिको जानकारी दिँदै, कलर्सले ठूलो मिडियाको रूप धारण गरिरहेको बताए।

उनले भने कि पहिले केवल एफएम रेडियोको रूपमा परिचालित कलर्सले अब अनलाइन पोर्टल र अनलाइन टिभीको स्थापना गरेर समाजको परिवर्तनशील धारसँगै काम गरिरहेको छ।नेपाल पत्रकार महासंघका केन्द्रीय सदस्य रिंकु गायत्री मिश्रले पत्रकारिताको संरक्षण आवश्यक रहेको र यसका लागि पत्रकार तथा समाज दुवैको सक्रिय योगदान अपरिहार्य भएको उल्लेख गरे।सो समारोहको अध्यक्षता कलर्सका प्रबन्ध निर्देशक रतन जयसवालले गरेका थिए।

कार्यक्रममा मिडियाका सल्लाहकार राकेश सिंह, कलर्सका कार्यक्रम सञ्चालक तथा वरिष्ठ पत्रकार श्यामसुन्दर शशि, मोडल खबरका सम्पादक सुजीत कुमार झा, कलर्सका पूर्व निर्देशक रामनरेश पाण्डे, जानकी टिभीका अध्यक्ष वैद्यनाथ साह, र कलर्सका समाचार संयोजक धीरेश दत्त लगायतका वक्ताहरूले आ-आफ्ना विचार व्यक्त गरे।समारोहमा सांस्कृतिक कार्यक्रमको पनि आकर्षक प्रस्तुति गरियो।