भीम आचार्यले लिए मुख्यमन्त्रीको शपथ

२०७८ भदौ १० गते

प्रदेश १ को मुख्यमन्त्रीमा भीम आचार्य नियुक्त भएका छन्।

बिहीबार बिहान विराटनगरस्थित एशिया होटलमा बसेको संसदीय दलको बैठकमा मुख्यमन्त्री शेरधन राईले आचार्यलाई दलको नेताका रुपमा प्रस्ताव गरेका थिए।

आचार्य सर्वसम्मत भएसँगै होटलबाट टोली प्रदेश प्रमुख सोमनाथ अधिकारी प्यासीसमक्ष मुख्यमन्त्रीका लागि सिफारिस गर्न पुगेको थियो।

प्रदेश कार्यालयमै आचार्यलाई मुख्यमन्त्रीको शपथग्रहण गराइएको पूर्वसामाजिक विकास मन्त्री जीवन घिमिरेले जानकारी दिए।

पूर्व मन्त्री घिमिरेले बिहीबार मुख्यमन्त्रीको शपथग्रहण गरिएको भए पनि तत्काल हालको मन्त्रीमण्डलमा हेरफेरको सम्भावना नरहेको जानकारी दिए।

संविधानको धारा १६८ ९१० अन्तर्गत बनेको शेरधन राई नेतृत्वको सरकार विघटन गरी सोही धारा अनुसार आचार्यको नेतृत्वमा पुनः एमालेको एकल सरकार गठन भएको हो।

मुख्यमन्त्रीको पदभार ग्रहण गरेका आचार्यले संविधान अनुसार ३० दिनभित्र पुनः विश्वासको मत लिनुपर्ने प्रावधान रहेको छ।

शेरधन राईले बिहीबार नै प्रदेश प्रमुख सोमनाथ प्यासी अधिकारीसमक्ष मुख्यमन्त्रीबाट राजीनामा बुझाएका थिए।

त्यसलगत्तै आचार्यलाई मुख्यमन्त्रीको शपथ ग्रहण गराइएको हो। राईले संसदीय दलको बैठकमा आचार्यलाई मुख्यमन्त्रीको प्रस्ताव गरेका थिए।