बिहारका दुई मुस्लिम गाउँ, जहाँ विवाहमा अझै गाइन्छ राम–दशरथका गीत

एजेन्सी, भाद्र ४ गते ।  बिहारको औरंगाबाद जिल्लाका बनतारा र पीरू गाउँका मुस्लिम परिवारमा पुस्तौँदेखि हिन्दू संस्कृतिसँग जोडिएका केही वैवाहिक परम्परा अझै कायम रहेको स्थानीयवासीले बताएका छन्। उनीहरू आफूहरूका पूर्वज हिन्दू रहेको बताउँदै त्यसप्रति गर्व गर्ने गरेको दाबी गर्छन्।

पीरू र बनतारा गाउँमा विवाहका क्रममा मडवा गाड्ने, हल्दी लगाउने, राम र दशरथसँग सम्बन्धित गीत गाउनेलगायतका परम्परा अझै कतिपय परिवारमा रहेको बताइएको छ। केही परिवारमा दुलाहा–दुलहीको जुत्ता लुकाउने, टोकरीमा खुट्टा राखेर घर प्रवेश गराउने तथा महिलाले सिन्दूर लगाउनेजस्ता चलनसमेत रहेको स्थानीयवासीको भनाइ छ। समयसँगै केही परम्परा कम हुँदै गए पनि धेरै परिवारले अझै निरन्तरता दिएको बताइएको छ।

स्थानीयवासीका अनुसार यी परिवारको धर्म परिवर्तनको इतिहास १४औँ शताब्दीको तुगलककालसँग जोडिएको छ। पीरूका केही परिवारले आफूहरू बम्भईका भूमिहार समुदायसँग सम्बन्धित मथुरा चौधरीका सन्तान रहेको बताउने गरेका छन्। त्यस्तै, बनताराका मुस्लिम परिवारले आफूहरू केयालगढका तिलकधारी प्रसाद चौधरीको वंशसँग सम्बन्धित रहेको दाबी गरेका छन्। धर्म परिवर्तनको कारणबारे भने स्थानीय तहमा विभिन्न धारणा रहेको बताइएको छ।

पीरू र बनताराका स्थानीयका अनुसार दुवै गाउँमा हिन्दू–मुस्लिम समुदायबीच पारिवारिक तथा सामाजिक सम्बन्ध कायम छ। उनीहरू एकअर्काका चाडपर्व र विवाहमा सहभागी हुने गरेका छन्। स्थानीयवासीले पुस्तौँदेखि चलिआएका यी परम्परालाई सामाजिक सद्भाव र सांस्कृतिक मिश्रणको उदाहरणका रूपमा प्रस्तुत गरेका छन्।