एनपीएलमा पोखरा एभेन्जर्सले जनकपुर बोल्ट्सलाई १५६ रनको लक्ष्य, सुमीत वर्माको नटआउट अर्धशतक

काठमाडौं, मंसिर ११ गते ।  दोस्रो संस्करणको सिद्धार्थ बैंक नेपाल प्रिमियर लिग (एनपीएल) मा पोखरा एभेन्जर्सले जनकपुर बोल्ट्सलाई १५६ रनको लक्ष्य दिएको छ । त्रिवि क्रिकेट मैदानमा टस जितेर पहिले ब्याटिङ गरेको पोखराले २० ओभरमा ६ विकेट गुमाउँदै १५५ रन जोड्यो । पोखराका सुमीत वर्माले नटआउट ५० रनको अर्धशतकीय इनिङ्स खेले, जसमा २९ बलमा २ चौका र ४ छक्का प्रहार गरे । दिनेश खरेलले ३८ बलमा ३८ रन बनाए भने एडम रोसिन्टनले १७ बलमा २४ रन र त्रित राज दासले २९ रन जोडे ।

जनकपुरका लागि सञ्जय कृष्णमूर्तीले ३ विकेट लिए भने अनिल शाह र ललितनारायण राजवंशीले १–१ विकेट हात पारे । आजको खेलमा दुवै टोली जित निकाल्ने लक्ष्यमा छन्, किनकि दुवैले यसअघिका दुई–दुई खेलमा जित हासिल गर्न सकेका छैनन् । यो खेलले उनीहरूको अभियानमा महत्वपूर्ण मोड ल्याउन सक्छ ।