एसिया कपमा भारत–पाक खेल विवादित : हात नमिलाउने भारतीय टोलीको निर्णयले थप्यो तनाव

एजेन्सी, भदौ ३० गते । एसिया कप २०२५ मा भारत र पाकिस्तानबीचको खेल राजनीतिक तनावका कारण विवादित बनेको छ। आइतबार भएको खेलमा भारतले पाकिस्तानलाई ७ विकेटले पराजित गरे पनि, खेलपश्चात् भारतीय खेलाडीहरूले पाकिस्तानी टोलीसँग हात मिलाउन अस्वीकार गरेपछि घटनाले थप चर्चा पाएको हो। सामान्यतया खेल सकिएपछि दुवै टोलीका खेलाडीहरूबीच हात मिलाउने परम्परा भए पनि, यसपटक भारतीय खेलाडीहरूले आपसमा मात्र हात मिलाएर सीधा ड्रेसिङ रुम फर्किएका थिए। यस घटनाले खेलमैत्री संस्कृतिलाई आघात पुगेको भन्दै आलोचना भइरहेका छन्।

भारतीय कप्तान सूर्यकुमार यादवले यसलाई शान्तिपूर्ण विरोधको रूपमा प्रस्तुत गर्दै यो जित भारतीय सेनालाई समर्पित गरिएको बताए। उनले अप्रिल २३ मा कश्मीरमा भएको आतंकवादी हमलामा २६ जना मारिएको घटनालाई सम्झँदै “जीवनमा खेलभन्दा माथि केही पीडाहरू हुन्छन्, हामी ती परिवार र हाम्रो सेनासँगै छौं” भने। भारतले उक्त हमलामा पाकिस्तानको संलग्नता आरोप लगाउँदै आएको छ। उता, पाकिस्तान क्रिकेट बोर्डले भारतीय खेलाडीहरूको व्यवहारप्रति आपत्ति जनाउँदै खेललाई राजनीति भन्दा बाहिर राख्न आग्रह गरेको छ। एसीसीका अध्यक्ष मोहसिन नकवीले समेत खेलमैदानमा राजनीति प्रवेश गर्नु खेलभावनाविपरीत भएको बताएका छन्।