बेंगलुरु भागदौड घटनाबाट कोहली स्तब्ध, आरसीबीले व्यक्त गर्‍यो गहिरो समवेदना

एजेन्सी, जेठ २२ गते । बुधबार बेंगलुरुको चिन्नास्वामी रंगशाला बाहिर भएको भागदौड घटनाबाट भारतीय क्रिकेटर विराट कोहली स्तब्ध भएका छन्। उनले सामाजिक सञ्जालमार्फत भावुक प्रतिक्रिया जनाउँदै लेखेका छन्, “मसँग भन्नको लागि कुनै शब्द छैन। म पूर्ण रूपमा भावुक छु।” कोहलीले रोयल च्यालेन्जर्स बैंगलोर (आरसीबी) ले जारी गरेको विज्ञप्ति पनि सेयर गरेका छन्, जसमा घटनाप्रति गहिरो दुःख व्यक्त गरिएको छ।

आरसीबीले विज्ञप्तिमा भनेको छ कि मिडिया रिपोर्टमार्फत प्रकट भएका दुःखद घटनाबाट टोली मर्माहत भएको छ। क्लबले जीवन र सम्पत्तिको क्षतिप्रति दुःख व्यक्त गर्दै पीडित परिवारप्रति समवेदना जनाएको छ। आईपीएल जितको उत्सवमा एक लाखभन्दा बढी समर्थकहरू भेला हुँदा उत्पन्न भीड व्यवस्थापनको अभावमा कम्तीमा ११ जनाको ज्यान गएको र धेरै जना घाइते भएको बताइएको छ। कर्नाटक सरकारद्वारा घटनाको मजिस्ट्रेटीय अनुसन्धानको घोषणा गरिसकिएको छ। १८ वर्षपछि आरसीबीले आईपीएल ट्रफी जितेको उत्सव अत्यन्त हर्षोल्लासपूर्ण भए पनि यस घटनाले वातावरणलाई शोकमग्न बनाएको छ।