बङ्गलादेशसँगको व्यापार घाटा: आठ महिनामा दुई अर्ब ६९ करोड रुपैयाँ

काठमाडौं, चैत १४ गते ।  चालु आर्थिक वर्षको आठ महिनामा नेपालले बङ्गलादेशसँग दुई अर्ब ६९ करोड २२ लाख ९८ हजार रुपैयाँको व्यापार घाटा व्यहोरेको छ। यस अवधिमा बङ्गलादेशबाट दुई अर्ब ९६ करोड ९१ लाख ५२ हजार रुपैयाँ बराबरका सामग्री आयात भएका छन्, जसमा सबैभन्दा बढी एक अर्ब ६० करोड रुपैयाँ बराबरको अप्रशोधित जुट रहेको छ। अन्य आयातित वस्तुहरूमा ब्याट्री, पोल्ट्री फिड सप्लिमेन्ट, कस्मेटिक सामग्री, हाइड्रोजन प्याराअक्साइड, जुट यार्न, विद्युतीय उपकरण, औषधि, आलु, पेपर, ग्लास, फुड एण्ड बेभरेज रहेका छन्।​

यसै अवधिमा नेपालबाट बङ्गलादेशतर्फ २७ करोड ६८ लाख ५४ हजार रुपैयाँ बराबरका सामग्री निर्यात भएका छन्, जसमा २३ करोड ६२ लाख ५८ हजार रुपैयाँ बराबरको खुदो प्रमुख रहेको छ। त्यसैगरी, जडीबुटी, घरायसी सामग्री तथा पशुआहार पनि निर्यात भएका छन्। नेपाल पारवहन तथा गोदाम व्यवस्थापन कम्पनी लिमिटेड, काँकडभिट्टाका प्रमुख सुवास पाण्डेयले द्विपक्षीय व्यापारमा सन्तुलन कायम हुन नसकेकोमा चिन्ता व्यक्त गर्दै बिजुली निर्यातबाट यो परिपूर्ति गर्न सकिने बताएका छन्।​