भारत तेस्रो पटक च्याम्पियन्स ट्रफी विजेता

एजेन्सी, फागुन २६ गते । युएईको दुबई अन्तर्राष्ट्रिय क्रिकेट रंगशालामा आइतबार सम्पन्न च्याम्पियन्स ट्रफीको फाइनलमा भारतले न्युजिल्यान्डलाई ४ विकेटले पराजित गर्दै उपाधि जितेको छ। यो भारतको तेस्रो च्याम्पियन्स ट्रफी उपाधि हो। यसअघि, भारतले सन् २००२ र २०१३ मा यो प्रतियोगिता जितेको थियो।

न्युजिल्यान्डले दिएको २५२ रनको लक्ष्य भारतले ६ विकेट गुमाउँदै ४९ ओभरमा पूरा गर्‍यो। कप्तान रोहित शर्माले ७६ रनको योगदान दिए भने श्रेयस अय्यरले ४८ रन बनाए। केएल राहुलले नटआउट ३४ रन जोडेपछि भारत विजयी भयो। बलिङतर्फ न्युजिल्यान्डका सान्टनर र ब्रासवेलले २-२ विकेट लिए।

टस जितेर पहिले ब्याटिङ गरेको न्युजिल्यान्डले ७ विकेटको क्षतिमा २५१ रन बनाएको थियो। ड्यारेल मिचेलले ६३ रन बनाए भने माइकल ब्रासवेलले नटआउट ५३ रनको योगदान गरे। बलिङतर्फ भारतका बरुण चक्रवर्ती र कुलदिप यादवले २-२ विकेट लिए भने मोहमद सामी र रवीन्द्र जडेजाले १-१ विकेट लिए।