कर्णालीले जनकपुरलाई १४२ रनको लक्ष्य दियो, अर्जुन र सोमपालको उत्कृष्ट प्रदर्शन

काठमाडौं, मंसिर १७ गते । नेपाल प्रिमियर लिग (एनपिएल) अन्तर्गत सोमबार भएको खेलमा कर्णाली याक्सले जनकपुर बोल्ट्सलाई १४२ रनको चुनौती प्रस्तुत गरेको छ। टस जितेर ब्याटिङ गरेको कर्णालीले २० ओभरमा ७ विकेट गुमाएर १४१ रन बनायो।

कर्णालीका लागि अन्तिम दुई ओभरमा अर्जुन घर्ती र कप्तान सोमपाल कामीले विस्फोटक प्रदर्शन गरे। अर्जुनले २२ बलमा ३३ रन बनाउँदै १९औं ओभरमा हर्ष थाकरको बलमा दुई चौका र दुई छक्कासहित २२ रन प्रहार गरे। सोमपालले १३ बलमा नटआउट २९ रन बनाउँदै जिमी निशमको अन्तिम ओभरमा तीन चौका र एक छक्कासहित २१ रन जोडे। उनीहरूको सातौं विकेटका लागि ५६ रनको साझेदारीले कर्णालीलाई प्रतिस्पर्धात्मक स्कोर बनाउन मद्दत गर्‍यो।

कर्णालीले खेलको सुरुवातमा दवाब झेल्यो। ओपनर देव खनाल दोस्रो ओभरमै आउट भए भने भारतीय स्टार शिखर धवनले १४ बलमा १४ रनमात्र जोड्न सके। मध्यक्रममा बाबर हायत (१२ रन) र गुल्सन झा (३६ रन) ले केही स्थिरता दिए पनि जनकपुरका बलरहरूले नियमित विकेट झिक्दै कर्णालीलाई १८ ओभरसम्म ९६/६ को स्थितिमा रोक्न सफल भए।

जनकपुरका लागि मोहम्मद मोहसिनले उत्कृष्ट बलिङ गर्दै २ विकेट लिए भने किशोर महतो, ललित राजवंशी, हर्ष थाकर र जिमी निशमले समान १-१ विकेट झारे। अब जनकपुरका ब्याटरहरू १४२ रनको लक्ष्य पछ्याउँदै मैदानमा उत्रनेछन्। खेल रोमाञ्चक हुने अपेक्षा गरिएको छ।