शिखर धवन र जिमी निशमबीचको रोमाञ्चक भिडन्त आज

काठमाडौं, मंसिर १७ गते ।  नेपाल प्रिमियर लिग (एनपिएल) अन्तर्गत कर्णाली याक्स र जनकपुर बोल्ट्सबीचको खेलमा कर्णालीले टस जितेर ब्याटिङ गर्ने निर्णय गरेको छ। कीर्तिपुरस्थित त्रिवि मैदानमा हुने यस खेलमा भारतीय क्रिकेटका चर्चित ओपनर शिखर धवन र न्युजिल्यान्डका स्टार अलराउन्डर जिमी निशमको सहभागिता मुख्य आकर्षण हुनेछ। धवन कर्णाली याक्समा आबद्ध छन् भने निशम जनकपुर बोल्ट्सका सदस्य हुन्।

३८ वर्षीय धवनले भारतीय क्रिकेटबाट गत वर्ष संन्यास लिएपछि नेपालमा खेल्न पाउने अवसर पाएका हुन्। टेस्ट, एकदिवसीय, र टी-२० गरी तीनै फर्म्याटमा उत्कृष्ट प्रदर्शन गरेका धवनले टेस्टमा ७ र एकदिवसीय खेलमा १७ शतक प्रहार गरेका छन्। यस्तै, निशमले न्युजिल्यान्डका लागि तीनै फर्म्याटमा खेलेका छन्। सन् २०१९ को विश्वकप फाइनलमा उत्कृष्ट प्रदर्शन गरेका निशम पछिल्लो समय अबुधाबी टी-१० लिग खेलिरहेका थिए।

कर्णाली याक्सका कप्तान सोमपाल कामीको नेतृत्वमा धवनसँगै गुल्सन झा, देव खनाललगायतका खेलाडीहरू छन्। जनकपुर बोल्ट्सका कप्तान अनिलकुमार साहको नेतृत्वमा आसिफ शेख, ललित राजवंशी, र हालका उत्कृष्ट प्रदर्शनकारी लाहिरू मिलान्था र हर्ष थाकर टोलीमा रहेका छन्। रोमाञ्चक खेलको अपेक्षासँगै दर्शकहरू त्रिवि मैदानमा जुट्न थालेका छन्।