सीतामढ़ीमा शराबबन्दीपछि सूखे नशाको तस्करी बढ्दो : १७ हजार ८३८ ट्याब्लेट, ७५४ कफ सिरप, १९.२ लिटर विदेशी रक्सी र तीन देशको मुद्रा बरामद

एजेन्सी, चैत्र ३ गते ।  बिहारको शराबबन्दीपछि सूखे नशाको प्रचलन र तस्करी दिनप्रतिदिन बढ्दै गएको छ। सीतामढ़ी जिल्लामा भारत–नेपाल सीमावर्ती क्षेत्रमा ड्रग्सको ठूलो खेप बारम्बार बरामद भइरहेको छ। बेला थानाको प्रहरीले शुक्रबार सिरसिया गाउँका विजय महतोको घरमा छापा मार्दा ठूलो परिमाणमा नशाको सामग्री बरामद गरेको छ। घरमा तलासी गर्दा १७ हजार ८३८ पीस नशाको ट्याब्लेट, ७५४ पीस प्रतिबन्धित कफ सिरप, ३८ पीस नशाको सुई (इन्जेक्सन) र १९.२ लिटर विदेशी रक्सी फेला परेको छ।

बरामद सामग्रीसँगै तीन देशको मुद्रा पनि प्रहरीले नियन्त्रणमा लिएको छ। जसमा १७ हजार ४७० भारतीय रुपैयाँ, ३९ हजार ११० नेपाली रुपैयाँ र १०२ अमेरिकी डलर रहेको छ। यसबाहेक ५ मोबाइल फोन पनि बरामद भएको छ। पक्राउ पर्नेमा सिरसिया गाउँकी अमृता कुमारी, पुष्पा देवी, अरुण कुमार, नेपालको महोत्तरी जिल्ला रामगोपालपुर थानाको विसम्भलपुर गाउँका विकास यादव र विजय यादव रहेका छन्। सबैलाई न्यायिक हिरासतमा पठाइएको छ। मुख्य तस्कर विजय महतो (हीरालाल महतोका छोरा) भने फरार छन्। प्रहरीले उनको खोजी तीव्र बनाएको छ। एसटीएफसहित बेला थानाको टोलीले गरेको यो छापा सीतामढ़ीमा ठूलो चर्चाको विषय बनेको छ।