श्रीमान्ले नै गरे पत्नीको हत्या, बेगूसराय घटनाले मच्चायो सनसनी

एजेन्सी, माघ २० गते ।  बिहारको बेगूसराय जिल्ला अन्तरगत तेयाय थाना क्षेत्रको रघुनंदनपुर गाउँमा एक महिलाको हत्या प्रकरणले सनसनी मच्चाएको छ। सुरुमा बाहिरी व्यक्तिहरूले गोली हानेर हत्या गरेको जस्तो देखिएको यो घटना पुलिस जांचमा श्रीमान् नै हत्यारा भएको खुलासा भएको छ।

मृतक महिलाको नाम सुमन कुमारी हो। उनको श्रीमान् चंदन चौधरी र नाबालिग छोरीले सुरुमा दुई बाइक सवार अपराधीले गोली हानेको आरोप लगाएका थिए। तर बेगूसरायका एसपी मनीष कुमारका अनुसार गहन अनुसन्धानपछि चंदन चौधरी नै हत्यारा भएको पुष्टि भएको छ। चंदनले श्रीमतीको कथित अवैध सम्बन्धको शंकामा हत्या गरेको स्वीकार गरेका छन्। सुमनको एक युवकसँग इंस्टाग्राममार्फत चार वर्षदेखि नजदीकी थियो र श्रीमान्ले बारम्बार रोक्न खोज्दा पनि नमानेपछि उनले हत्याको योजना बनाएका थिए।

घटना फेब्रुअरी १ तारिखको हो। सुमन आफ्नो श्रीमान् र छोरीसँग बहिनीको घरमा पूजा समारोहमा जाँदै थिइन्। बाटोमा शौच जाने बहाना बनाएर चंदनले श्रीमतीलाई गोली हानेका थिए। हत्यापछि उनले गाउँकै एक युवकमाथि आरोप लगाउने प्रयास गरेका थिए तर प्रमाणका आधारमा पुलिसले उनलाई पक्राउ गर्‍यो। पूछताछमा चंदनले अपराध स्वीकार गरिसकेका छन्। अहिले उनलाई जेल पठाइएको छ र कानुनी कारबाही जारी छ।