सिरहामा एम्बुलेन्सबाट लागुऔषध ओसारपोसार गर्ने एकजना पक्राउ

साउन ३१ गते ।एम्बुलेन्सबाट लागुऔषध ओसारपोसार गरिरहेका एकजना सिरहाबाट पक्राउ परेका छन्।

पक्राउ पर्नेमा एम्बुलेन्स चालक सिरहाको धनगढीमाई नगरपालिका-९ बस्ने २९ वर्षीय सरोज लामा रहेको जिल्ला प्रहरी कार्यालय सिरहाले जनाएको छ।

सोमबार राति करिब पौने ९ बजेको समयमा इलाका प्रहरी कार्यालय लहान र ट्राफिक प्रहरी कार्यालयबाट खटेको प्रहरी टोलीले लहान नगरपालिका-१ स्थित पूर्व-पश्चिम राजमार्गमा सवारी साधनहरू चेकजाँच गर्ने क्रममा एम्बुलेन्सबाट ९० केजी गाँजा बरामद गरेको निमित्त प्रवक्ता प्रहरी निरीक्षक रामचन्द्र साहले जानकारी दिए।

पश्चिमबाट पूर्वतर्फ आउँदै गरेको को १ च ७५७७ नम्बरको एम्बुलेन्सलाई चेकजाँच गर्ने क्रममा एम्बुलेन्सको पछाडि बिरामी राख्ने भागमा प्लाष्टिकको ५ वटा बोरामा अवैध लागुऔषध गाँजा र नेपाली रुपैयाँ २८ हजार बरामद भएको प्रहरी निरीक्षक साहले बताए।

पक्राउ परेका लामालाई नियन्त्रणमा लिइ इलाका प्रहरी कार्यालय लहानबाट थप अनुसन्धान भइरहेको जिल्ला प्रहरी कार्यालय सिरहाले जनाएको छ।