आम्रपाली दुबेकी नयाँ फिल्म ‘लाखों में एक पवले बानी हम बहुरानी’को फर्स्ट लुक सार्वजनिक

एजेन्सी, बैशाख १६ गते । भोजपुरी सिनेमाकी चर्चित अभिनेत्री आम्रपाली दुबेको नयाँ फिल्म ‘लाखों में एक पवले बानी हम बहुरानी’को फर्स्ट लुक सार्वजनिक गरिएको छ, जसले सार्वजनिक भएसँगै सामाजिक सञ्जालमा चर्चा बटुलिरहेको छ। ‘रेणु विजय फिल्म्स एंटरटेनमेंट’को ब्यानरमा बनेको यो पारिवारिक फिल्म आगामी १ मेमा देशभरका हलहरूमा प्रदर्शन हुनेछ भने यसको ट्रेलर २८ अप्रिलमा युट्युबमार्फत सार्वजनिक गरिनेछ। फिल्ममा आम्रपाली एक सशक्त, संवेदनशील र पारिवारिक महिलाको भूमिकामा देखिनेछिन्।

निर्माता निशान्त उज्जवल र निर्देशक अजय झाद्वारा निर्माण गरिएको यस फिल्मको कथा तथा संवाद अरबिन्द तिवारीले तयार पारेका हुन्। फिल्ममा परम्परागत र आधुनिक मूल्यबीच सन्तुलन प्रस्तुत गर्ने प्रयास गरिएको छ। आम्रपालीका अनुसार यो फिल्म उनको निकै नजिकको परियोजना हो र यसमा उनले परिवार, संस्कार र आत्मसम्मानबीच सन्तुलन कायम गर्ने बुहारीको भूमिका निभाएकी छन्। फिल्ममा जय यादव, संगीता तिवारी, अविनाश साहीलगायत कलाकारहरूको अभिनय रहनेछ भने संगीत ओम झा र रजनीश मिश्राले दिएका छन्।