उदित नारायणविरुद्ध एफआईआर दर्ता : पहिलो पत्नी रञ्जनाले आरोप लगाइन् – गर्भाशय निकालिदिए

एजेन्सी, माघ २८ गते । बलिउडका चर्चित गायक उदित नारायणविरुद्ध उनकी पहिलो पत्नी रञ्जना नारायणले एफआईआर दर्ता गराएकी छन्। मङ्गलबार (फेब्रुअरी १०, २०२६) महिला थानामा उजुरी दिँदै रञ्जनाले उदित, उनका भाइहरू संजय कुमार झा र ललित नारायण झा तथा दोस्रो पत्नी दीपा नारायणले १९९६ मा उनको गर्भाशय (यूट्रस) बिना जानकारी निकालिदिएको आरोप लगाएकी छन्।

रञ्जनाले वकिल करुणाकान्त झासँगै थाना पुगेर भनेकी छन्, उदितसँग उनको विवाह ७ डिसेम्बर १९८४ मा हिन्दू रीतिरिवाजअनुसार भएको थियो। उदित मुंबईमा गायन करियर बनाउन गएपछि उनले दोस्रो विवाह दीपासँग गरे। १९९६ मा उदित र उनका भाइहरूले रञ्जनालाई दिल्लीको अस्पताल लगेका थिए जहाँ उनको गर्भाशय निकालियो। यो कुरा उनलाई बताइएन। २००६ मा मुंबई पुग्दा उदित र दीपाले गाली दिए र घरमा प्रवेश दिन अस्वीकार गरे। त्यसपछि उनी नेपालको ससुराल गएकी थिइन् तर त्यहाँबाट पनि भगाइएकी थिइन्। हाल उनी माइतीमा बसिरहेकी छन्।

रञ्जनाले सुपौलको परिवार अदालतमा पनि मुद्दा दायर गरेकी छन् जसको सुनुवाइ बाँकी छ। महिला आयोगमा पनि उजुरी दिएपछि उदितले रञ्जना आफ्नी पत्नी भएको स्वीकार गरेका थिए र साथ राख्ने भनेका थिए तर हालसम्म इज्जत र आर्थिक सहयोग नदिएको उनको भनाइ छ। पुलिसले यो ३० वर्ष पुरानो घटना भएकाले पहिले अनुसन्धान गर्ने र प्रमाण मिलेपछि एफआईआर दर्ता गर्ने बताएको छ।

फेब्रुअरी २०२५ मा उदित सुपौल परिवार अदालतमा उपस्थित भएका थिए। उनले रञ्जनासँग सम्झौता गर्न अस्वीकार गर्दै केस लड्ने बताएका थिए। उनले लिखित जवाफमा भनेका थिए, “रञ्जना पैसा ऐँठनका लागि यो सब गरिरहेकी छन्। अदालतमा झुट बोलेकी छन्।” महिला आयोगको अनुसन्धानमा उदितले रञ्जनालाई मासिक १५ हजार (पछि २५ हजार) दिने, १ करोडको घर र कृषि जग्गा दिएको पाइएको थियो। जग्गामा बनेको कोठा ६ हजार मासिक भाडामा दिइएको छ। रञ्जना उदितसँगै बस्न चाहन्छिन् तर उदितले अस्वीकार गरेका छन्।

उदितले दीपा गहतराजसँग दोस्रो विवाह गरेका थिए। दीपा मुंबईमा करियर बनाउन आएकी थिइन् र त्यहीँ दुवैबीच प्रेम भयो। पहिलो पत्नीलाई तलाक नदिई दोस्रो विवाह गरेका थिए। १९८७ मा छोरा आदित्य नारायणको जन्म भएको थियो जो हाल चर्चित गायक हुन्। यो घटनाले उदित नारायणको व्यक्तिगत जीवनमा फेरि विवाद निम्त्याएको छ। थप अनुसन्धान जारी छ।