‘बोले चूडियाँ’मै उड्यो पूरा बजेट: निखिल आडवाणीले सुनाए ‘कभी खुशी कभी गम’को रोचक किस्सा

एजेन्सी, पुष २९ गते । बलिउडको २५ वर्ष पुरानो ब्लकबस्टर फिल्म ‘कभी खुशी कभी गम’ को पहिलो गीत ‘बोले चूडियाँ’ को सुटिङमै सुरुवाती बजेट सकिएको रोचक खुलासा निर्देशक निखिल आडवाणीले गरेका छन्। धर्मा प्रोडक्सनमा असिस्टेन्ट निर्देशकका रूपमा करियर सुरु गरेका आडवाणीका अनुसार, फिल्मको प्रारम्भिक बजेट मात्र ३ करोड रुपैयाँ तय गरिएको थियो, जुन पहिलो गीतकै भव्य सेट, सयौँ डान्सर र जुनियर आर्टिस्ट, तथा महँगो सजावटमा खर्च भयो।

आडवाणीले रेडियो नशासँगको कुराकानीमा बताएअनुसार, ‘बोले चूडियाँ’ को सेटमा २०० डान्सर, ३०० जुनियर आर्टिस्ट र विशेष झूमरसहित भव्य तयारी गरिएको थियो। चिया ब्रेकका क्रममा निर्माता यश जौहरले बजेट सोध्दा ३ करोड रुपैयाँ लेखिएको कागज देखाएर “यो त यही सेटमै सकियो” भन्दै कागज च्याते र फिल्म बनाउन अघि बढ्न निर्देशन दिए। त्यसपछि फिल्मको कुल बजेट बढेर करिब ४० करोड रुपैयाँ पुगेको थियो।

सन् २००१ मा रिलिज भएको ‘कभी खुशी कभी गम’ ले विश्वभर १३६ करोड रुपैयाँभन्दा बढी ग्रस कलेक्सन गरेको थियो। अमिताभ बच्चन, शाहरुख खान, काजोल, ऋतिक रोशन र करीना कपूरजस्ता कलाकारको अभिनयले सजिएको यो फिल्म आज पनि दर्शकका लागि स्मरणीय छ। निखिल आडवाणीका अनुसार, यश जौहरको जस्तो फिल्मप्रतिको जुनून आजका फिल्ममेकरहरूमा कम हुँदै गएको छ, जुन सिनेमा इतिहासको एउटा विशेष अध्याय थियो।