राजनीतिले चिरिएको मित्रता: शत्रुघ्न सिन्हाले सुनाए राजेश खन्नासँगको मन दुखाउने कथा

एजेन्सी, पुष २९ गते । दिग्गज अभिनेता शत्रुघ्न सिन्हाले दिवंगत सुपरस्टार राजेश खन्नासँगको गहिरो मित्रता राजनीतिका कारण कसरी टुट्यो भन्ने कुरा खुलेर बताएका छन्। दिल्ली निर्वाचनमा एक–अर्काविरुद्ध उम्मेदवार बनेपछि राजेश खन्नाले लामो समयसम्म आफूहरूसँग बोलचाल बन्द गरेको शत्रुघ्नको भनाइ छ। उनले टाइम्स अफ इन्डियासँगको एक पुरानो अन्तर्वार्तामा चुनावी प्रतिस्पर्धाले खन्नालाई मानसिक रूपमा आहत बनाएको र त्यसको असर उनीहरूको सम्बन्धमा परेको उल्लेख गरेका थिए।

शत्रुघ्नका अनुसार राजेश खन्नालाई “मेरो विरुद्ध तिमी कसरी उभिन सक्यौ?” भन्ने भावनाले निकै सताएको थियो। उनले आफू व्यक्तिगत रूपमा होइन, पार्टीको निर्णयअनुसार चुनावमा उत्रिएको स्पष्ट पारे पनि गलतफहमी बढ्दै गयो। चुनावमा राजेश खन्ना थोरै मतले पराजित भए र पछि पुनः चुनाव हुँदा पनि शत्रुघ्न नै उनका प्रतिद्वन्द्वी बने। यसले पुरानो मित्रतामा गहिरो दरार ल्यायो।

लामो समयपछि मेलमिलापको प्रयास गर्दै शत्रुघ्नले माफीसमेत मागेको बताए। अस्पतालमा उपचाररत रहँदा राजेश खन्नासँग भेट्ने इच्छा भए पनि त्यो पूरा हुन नसकेको पीडा उनले व्यक्त गरे। “एक दिन छोरी सोनाक्षीले राजेश खन्ना अब रहेनन् भनेपछि मन अत्यन्त भारी भयो,” उनले भने। राजनीतिक मतभेदका बाबजुद शत्रुघ्न सिन्हा र राजेश खन्नाले ‘नसीब’, ‘मकसद’ र ‘आज का एमएलए राम अवतार’ जस्ता स्मरणीय चलचित्रमा सँगै काम गरेका थिए, जसले उनीहरूको सिनेमाई यात्रालाई अमर बनाएको छ।