एसईई परीक्षा तयारी पूरा, विद्यार्थी संख्या बढ्दा केन्द्रहरूको संख्या बढ्यो

काठमाडौं,चैत ४ गते । राष्ट्रिय परीक्षा बोर्ड, परीक्षा नियन्त्रण कार्यालयले यस वर्षको माध्यमिक शिक्षा परीक्षा (एसईई) को सम्पूर्ण तयारी पूरा भएको जनाएको छ। परीक्षा नियन्त्रक नन्दलाल पौडेलका अनुसार चैत ७ गतेदेखि देशभर एकैसाथ सुरु हुने परीक्षाका लागि आवश्यक प्रश्नपत्र, उत्तरपुस्तिका, सिम्बोल नम्बर तथा अन्य सामग्री सबै जिल्लामा पठाइसकिएको छ। गत वर्षको तुलनामा यस पटक परीक्षार्थीको संख्या ४९,२८६ ले वृद्धि भई ५,१४,०७१ पुगेको छ।

विद्यार्थी संख्यामा वृद्धि भएकाले देशभर २,०७९ परीक्षा केन्द्र निर्धारण गरिएको छ। परीक्षामा १५० भन्दा बढी विद्यार्थी भएका केन्द्रमा सहायक केन्द्राध्यक्ष नियुक्त गरिनेछ भने २० विद्यार्थी बराबर एक जना निरीक्षक खटाइनेछ। यस वर्ष विशेष व्यवस्थाका रूपमा काठमाडौं र दैलेखका कारागार तथा भक्तपुरको बाल सुधार गृहमा परीक्षा केन्द्र तोकिएको छ। साथै, कीर्तिपुरस्थित सफलता एचआईभी शिक्षा सदनबाट चार जना एचआईभी सङ्क्रमित विद्यार्थीले पनि परीक्षा दिने व्यवस्था गरिएको छ।

एसईई परीक्षा चैत ७ गतेदेखि १९ गतेसम्म बिहान ८ बजेबाट ११ बजेसम्म सञ्चालन हुनेछ। पहिलो दिन अनिवार्य अंग्रेजी, संस्कृत वेदविद्या र मदरसातर्फ अनिवार्य अरबी भाषाको परीक्षा हुनेछ। क्रमशः चैत ८ गते नेपाली, चैत १० गते गणित, चैत १२ गते विज्ञान तथा प्रविधि, चैत १३ गते सामाजिक शिक्षा, चैत १४ र १५ गते ऐच्छिक विषयहरूको परीक्षा हुने तालिका छ। यस वर्ष पनि लेटर ग्रेडिङ प्रणाली अपनाइनेछ भने उत्तीर्ण दर ७० प्रतिशत पुर्‍याउने लक्ष्य राखिएको छ। गत वर्ष ४८ प्रतिशत मात्र विद्यार्थी उत्तीर्ण भएका थिए।