क्यान महासंघद्वारा ‘नेसनल आईसीटी स्कलरसिप–२०८१’ को आवेदन खुला, ४९ विद्यार्थीलाई छात्रवृत्ति प्रदान गरिने

काठमाडौं, फागुन ९ गते । नेपालको सूचना तथा सञ्चार प्रविधि क्षेत्रमा ३३ वर्षदेखि सक्रिय कम्प्युटर एशोसियसन नेपाल (क्यान) महासंघले ‘नेसनल आईसीटी स्कलरसिप–२०८१’ को आवेदन खुला गरेको छ। विगत सात वर्षदेखि प्राविधिक शिक्षाका लागि प्रदान गरिँदै आएको यो छात्रवृत्ति कार्यक्रमको उद्घाटन सूचना तथा सञ्चार प्रविधिमन्त्री पृथ्वीसुब्बा गुरुङले गर्नुभएको छ। मन्त्री गुरुङले यो कार्यक्रमले विद्यार्थीलाई डिजिटल युगमा आवश्यक सीप प्रदान गरी नेपाललाई विश्वव्यापी सूचना प्रविधि क्षेत्रमा अग्रस्थानमा पुर्याउन योगदान गर्ने विश्वास व्यक्त गर्नुभयो। उहाँले सूचना प्रविधिको परिवर्तनशील दुनियाँमा नवीनतम प्रविधि सिक्नुपर्ने आवश्यकता औंल्याउँदै यो छात्रवृत्तिलाई स्नातकोत्तर तहसम्म विस्तार गर्न सके अनुसन्धान र उद्योग तयारी क्षमता अझ बलियो हुने बताउनुभयो।

क्यान महासंघले लर्ड बुद्ध एजुकेसन फाउन्डेसनसँगको सहकार्यमा यो छात्रवृत्ति कार्यक्रम सञ्चालन गर्दै जेहेन्दार र आर्थिक रूपमा कमजोर विद्यार्थीलाई लक्षित गरेको छ। क्यान महासंघका अध्यक्ष सुनैना घिमिरे पाण्डेका अनुसार यस वर्ष ४९ विद्यार्थीलाई आंशिक र पूर्ण छात्रवृत्ति प्रदान गरिनेछ। यो कार्यक्रमले ग्रामीण क्षेत्रका विपन्न विद्यार्थीलाई सूचना प्रविधिमा करियर बनाउने अवसर प्रदान गर्नुका साथै डिजिटल नेपाल फ्रेमवर्कलाई सहयोग गर्ने उहाँले बताउनुभयो। लर्ड बुद्ध एजुकेसन फाउन्डेसनका अध्यक्ष पंकज जलानले सातै प्रदेशका विद्यार्थीलाई समान अवसर दिने उद्देश्यले प्रत्येक प्रदेशबाट एक छात्रालाई पूर्ण छात्रवृत्ति, २८ छात्रालाई फिमेल मेरिट आईसीटी स्कलरसिप र २१ जनालाई आईसीटी मेरिट स्कलरसिप प्रदान गरिने जानकारी दिनुभयो।

छात्रवृत्ति संयोजक रणजीत पोदारले उद्योगसँगको सहकार्यमार्फत विद्यार्थीलाई व्यावहारिक सीप र रोजगारीका लागि तयार पार्न जोड दिइएको बताउनुभयो। क्यान महासंघ र लर्ड बुद्ध एजुकेसन फाउन्डेसनबीचको सम्झौताअनुसार ४९ विद्यार्थीले कुल दुई करोड १३ लाख एक हजार रुपियाँ बराबरको छात्रवृत्ति पाउनेछन्। छात्रवृत्ति प्राप्त गर्ने विद्यार्थीले मलेसियाको एसिया प्यासिफिक युनिभर्सिटीको सम्बन्धनमा सञ्चालित लर्ड बुद्ध एजुकेसन फाउन्डेसनमा बीएससी आईटी अध्ययन गर्नेछन्। आवेदनका लागि प्लस टु उत्तीर्ण र कक्षा १० को गणितमा कम्तीमा ५० प्रतिशत अंक ल्याएका विद्यार्थीले फागुन २५, २०८१ सम्म क्यान महासंघ वा फाउन्डेसनको वेबसाइटमार्फत आवेदन दिन सक्नेछन्। यो कार्यक्रमले डिजिटल विभाजन घटाउन र डिजिटल नेपाल निर्माणमा योगदान दिने अपेक्षा गरिएको छ।