प्रकृति लम्सालको मृत्यु प्रकरण: नेपाली विद्यार्थीमाथि दुर्व्यवहार गर्ने कर्मचारी बर्खास्त

जनकपुरधाम, फागुन ६ गते । भारतको ओडिसा राज्यस्थित कालिंगा इन्स्टिच्युट अफ इन्डस्ट्रियल टेक्नोलोजी (केआईआईटी) को छात्रावासमा नेपाली विद्यार्थीहरूमाथि दुर्व्यवहार गर्ने दुई सुरक्षा कर्मचारीलाई बर्खास्त गरिएको छ। बुटवलकी छात्रा प्रकृति लम्सालको शंकास्पद मृत्युपछि विरोध गरिरहेका नेपाली विद्यार्थीहरूलाई रातारात निकाल्ने र दमन गर्ने घटनापछि विश्वविद्यालय प्रशासनले कारबाही प्रक्रिया अघि बढाएको हो। साथै, केआईआईटीका अन्तर्राष्ट्रिय सम्बन्ध कार्यालयका एक वरिष्ठ प्रशासनिक अधिकारीलाई अनुसन्धानका लागि निलम्बन गरिएको छ।

केआईआईटी प्रशासनले लम्सालको मृत्युलाई आत्महत्या भने पनि विद्यार्थीहरूले यो दाबी अस्वीकार गर्दै निष्पक्ष छानबिनको माग गर्दै प्रदर्शन गरेका थिए। विरोध चर्किएपछि ठूलो संख्यामा नेपाली विद्यार्थीहरूलाई जबरजस्ती छात्रावासबाट बाहिर निकालिएको थियो। विश्वविद्यालयका कर्मचारीहरूले विद्यार्थीमाथि गरेको दुर्व्यवहारको भिडियो सार्वजनिक भएसँगै नेपाल र भारतमा चौतर्फी आलोचना भएको थियो। व्यापक दबाबपछि प्रशासनले कारबाही अघि बढाएको र नेपाली विद्यार्थीहरूलाई फर्काउन पहल गरेको बताइएको छ।