शिक्षा मन्त्रालयद्वारा ७ अर्ब ३९ करोड रुपैयाँ बराबरको छात्रवृत्ति वितरण

काठमाडौं, माघ २२ गते ।  शिक्षा, विज्ञान तथा प्रविधि मन्त्रालयले चालु आर्थिक वर्षमा ७ अर्ब ३९ करोड ७२ लाख ६५ हजार रुपैयाँ बराबरको छात्रवृत्ति वितरण गर्ने भएको छ। विद्यालय तहदेखि उच्च शिक्षासम्मका विद्यार्थीलाई लक्षित गरी उक्त रकम विनियोजन गरिएको मन्त्रालयले जनाएको छ।

विद्यालय शिक्षा छात्रवृत्तिअन्तर्गत १२,०६५ विद्यार्थीले प्रति विद्यार्थी ५०,००० रुपैयाँका दरले छात्रवृत्ति प्राप्त गर्नेछन्। यसका लागि मन्त्रालयले ६० करोड ३२ लाख ५० हजार रुपैयाँ छुट्याएको छ।

गैरआवासीय छात्रवृत्तिअन्तर्गत कक्षा १ देखि १२ सम्मका १५ लाख ४० हजार १०३ विद्यार्थी लाभान्वित हुनेछन्। यस प्रयोजनका लागि ६२ करोड ७० लाख ४७ हजार रुपैयाँ विनियोजन गरिएको छ।

प्राविधिक तथा व्यावसायिक शिक्षा छात्रवृत्तिअन्तर्गत ८,२४५ विद्यार्थीलाई प्राविधिक शिक्षाका लागि ५ करोड ९४ लाख रुपैयाँ प्रदान गरिनेछ।

उच्च शिक्षा छात्रवृत्तिका लागि कुल ३९ करोड ४६ लाख रुपैयाँ छुट्याइएको छ। यसअन्तर्गत सहिद तथा द्वन्द्व पीडित विद्यार्थी, मुक्त कमलरी, मुस्लिम महिला, अपाङ्गता भएका विद्यार्थीलाई वार्षिक २४,००० रुपैयाँ छात्रवृत्ति प्रदान गरिनेछ।

त्यस्तै, आर्थिक रूपमा विपन्न तथा दलित विद्यार्थीका लागि साधारण विषयमा वार्षिक १५,००० रुपैयाँ र प्राविधिक विषयमा वार्षिक २१,००० रुपैयाँ छात्रवृत्ति उपलब्ध गराइनेछ।

चिकित्सा शिक्षा छात्रवृत्तिअन्तर्गत १०,५९४ विद्यार्थीले ५ अर्ब ११ करोड २९ लाख ६८ हजार रुपैयाँ बराबरको छात्रवृत्ति प्राप्त गर्नेछन्। यस योजनामा अघिल्लो वर्षका लाभान्वित विद्यार्थीहरूले पनि निरन्तरता पाउने शिक्षा मन्त्रालयले जनाएको छ।