विवाहअघि लिभ–इन सम्बन्धमा बस्न जीनत अमानको सुझाव, सम्बन्ध बुझ्न समय दिनुपर्ने धारणा

एजेन्सी, असार १६ गते । बलिउडकी चर्चित अभिनेत्री जीनत अमान ले विवाहअघि जोडीहरूले केही समय लिभ–इन सम्बन्धमा बसेर एकअर्कालाई राम्रोसँग बुझ्नुपर्ने धारणा व्यक्त गरेकी छन्। ७४ वर्षीया अभिनेत्रीले हालैको एक अन्तर्वार्तामा कानुनी रूपमा विवाहजस्तो दीर्घकालीन प्रतिबद्धतामा बाँधिनुअघि मानसिक, भावनात्मक तथा व्यवहारिक अनुकूलता सुनिश्चित गर्न आवश्यक रहेको बताइन्। उनका अनुसार, “१५ वर्षसम्म असन्तुष्ट वैवाहिक जीवन बिताउनुभन्दा पाँच वर्ष खुसीसाथ सँगै बसेर सम्बन्धको वास्तविकता बुझ्नु उपयुक्त हुन्छ।”

जीनत अमानले सम्बन्धमा प्रेम मात्र पर्याप्त नहुने भन्दै भविष्यको योजना, आर्थिक सोच, सन्तानको पालनपोषण र दैनिक जीवनका चुनौतीबारे समेत समान समझदारी आवश्यक पर्ने उल्लेख गरिन्। उनले आफ्नो व्यक्तिगत जीवनका अनुभवले यस्तो दृष्टिकोण विकास भएको संकेत दिँदै सम्बन्धमा समायोजन, संवाद र आपसी तालमेलको महत्व औँल्याइन्। यद्यपि, उनको लिभ–इन सम्बन्धसम्बन्धी धारणा विवादरहित भने छैन। अभिनेत्री सायरा बानो लगायत केही समकालीन कलाकारहरूले यसप्रति असहमति जनाएका छन् भने सामाजिक सञ्जालमा पनि यस विषयमा मिश्रित प्रतिक्रिया देखिएको छ।