बिहारमा विश्वासमतअघि आरोप–प्रत्यारोप, तेजस्वी यादवको सम्राट चौधरीमाथि कटाक्ष

एजेन्सी,बैशाख ११ गते । बिहारका मुख्यमन्त्री सम्राट चौधरी नेतृत्वको सरकारले शुक्रबार विधानसभा बैठकमा विश्वासमत लिने तयारी गरेको छ। यसअघि प्रतिपक्षका नेता तेजस्वी यादवले यदि पहिल्यै मुख्यमन्त्री तय गरिएको थियो भने एकदिने विशेष अधिवेशनको आवश्यकता नरहेको टिप्पणी गरेका छन्। उनले नीतीश कुमारलाई हटाएर “निर्वाचित मुख्यमन्त्रीलाई चयन गरिएको मुख्यमन्त्रीले प्रतिस्थापन गरेको” भन्दै व्यंग्य गरेका छन्।

तेजस्वीले सम्राट चौधरीप्रति व्यंग्यात्मक धन्यवाद व्यक्त गर्दै राजनीतिक असन्तुष्टि बढेको दाबी गरे। उनले सरकारको आर्थिक अवस्था, ऋणभार र विकासको गतिबारे प्रश्न उठाउँदै बिहारको अवस्था कमजोर रहेको टिप्पणी गरे। साथै, महिला आरक्षण विधेयकमा पिछडिएको वर्ग (ओबीसी) का लागि पनि आरक्षण हुनुपर्ने माग राख्दै केन्द्र सरकारसँग विशेष प्याकेज ल्याउन आग्रह गरे। विपक्षले कडा आलोचना गरे पनि राज्यलाई शीर्ष पाँच विकसित राज्यमा पुर्‍याउन सहयोग गर्ने प्रतिबद्धता जनाएको छ।