सरकारद्वारा ‘राष्ट्रिय प्रतिबद्धतापत्र’ सार्वजनिक, ७% आर्थिक वृद्धि र १५ लाख रोजगारी लक्ष्य

काठमाडौं,बैशाख १ गते ।  बालेन्द्र शाह को नेतृत्वमा गठित सरकारले विभिन्न राजनीतिक दलका घोषणापत्र समेट्दै ‘राष्ट्रिय प्रतिबद्धतापत्र’ सार्वजनिक गरेको छ। जेन–जी आन्दोलन र पछिल्लो निर्वाचनपछिको राजनीतिक सहमतिमा आधारित यो दस्ताबेज शासकीय सुधारसम्बन्धी १०० बुँदे कार्यसूचीअनुसार तयार पारिएको हो, जसलाई आगामी नीति, कार्यक्रम र बजेटमार्फत कार्यान्वयन गरिने जनाइएको छ।

प्रतिबद्धतापत्रमा आर्थिक स्थायित्वलाई प्राथमिकता दिँदै आगामी पाँच वर्षभित्र ७ प्रतिशत आर्थिक वृद्धि, प्रतिव्यक्ति आय ३ हजार डलर र १५ लाख रोजगारी सिर्जना गर्ने लक्ष्य राखिएको छ। साथै कृषिमा आत्मनिर्भरता, पर्यटन प्रवर्द्धन, ऊर्जा उत्पादन वृद्धि, सुशासन सुधार, शिक्षा–स्वास्थ्यमा पहुँच विस्तार तथा सूचना प्रविधि क्षेत्रको विकासलाई मुख्य एजेन्डा बनाइएको छ।