गोलबजारमा वडाध्यक्षले नै स्वास्थ्य चौकीमा तालाबन्दी : जनशक्ति र औषधि अभावको गुनासो

जनकपुरधाम, पुष २९ गते ।  जिल्लाको गोलबजार नगरपालिका–१० स्थित स्वास्थ्य चौकीमा वडाध्यक्ष उपेन्द्र मुखियाले सोमबार तालाबन्दी गरेका छन्। स्वास्थ्य चौकी भए पनि पर्याप्त जनशक्ति नभएको, उपलब्ध चिकित्सकहरू समयमा नआउने, सधैं औषधिको अभाव हुने तथा नगरपालिकामा पटक–पटक गुनासो गर्दा पनि कुनै सुनुवाइ नभएपछि बाध्य भएर तालाबन्दी गर्नुपरेको वडाध्यक्ष मुखियाले बताएका छन्।

'नागरिकहरूबाट निरन्तर गुनासा आइरहेका छन्। मैले बारम्बार नगरपालिकासँग सहयोग माग्दा पनि बेवास्ता भयो,' उनले भने, 'अब बाध्य भएर स्वास्थ्य चौकीमा ताला लगाएको छु। जबसम्म यहाँको जनशक्ति, औषधि र सेवा सुधारको समस्या सम्बोधन हुँदैन, तबसम्म ताला खुल्ने छैन।'

यो घटनाले स्थानीय तहमा स्वास्थ्य सेवाको अवस्था र जनप्रतिनिधि तथा प्रशासनबीचको समन्वयको कमी उजागर गरेको छ। स्वास्थ्य चौकीमा सेवा प्रभावित हुँदा स्थानीय बासिन्दाहरूले निकै कठिनाइ भोगिरहेका छन्। वडाध्यक्षको यो कदमलाई कतिपयले दबाबमूलक कदम भनेका छन् भने कतिपयले जनताको हितका लागि सही कदम भएको बताएका छन्।

गोलबजार नगरपालिकाले यो विषयमा तत्काल ध्यान दिनुपर्ने देखिएको छ। स्वास्थ्य सेवालाई प्रभावकारी बनाउन जनशक्ति थप्ने, औषधिको नियमित आपूर्ति सुनिश्चित गर्ने र चिकित्सकहरूको उपस्थिति कडाइका साथ अनुगमन गर्ने जस्ता कदम चाल्न आवश्यक छ। अन्यथा यस्ता तालाबन्दीका घटना थप बढ्न सक्छन्।