जनकपुरधाममा रोशनी झाको रहस्यमय मृत्यु : श्रीमान् प्रशान्त मिश्रासहितका आरोपीविरुद्ध किटानी जाहेरी

जनकपुरधाम, मंसिर १४ गते ।  जनकपुरधाम उपमहानगरपालिका–४ कटैया चौरीकी २७ वर्षीया रोशनी झा (मिश्रा) को रहस्यमय मृत्यु भएको घटनामा पीडित परिवारले श्रीमान् प्रशान्त मिश्रा र उनका आफन्तहरूमाथि हत्याको आरोप लगाएका छन् । बिहीबार राति रोशनी भर्‍याङबाट खसेको भन्दै माइती पक्षलाई जानकारी दिइए पनि पछि फाँसी लागेको बताइएपछि शंका बढेको थियो । परिवारले घाँटी थिचेर हत्या गरेको र प्रमाण नष्ट गर्न कपडा तथा अन्य सामान जलाइएको दाबी गर्दै न्यायका लागि गुहार मागेका छन् । घटनास्थलमा जलाइएका अवशेषहरू फेला परेको र आरोपीहरूले पटक–पटक अभिव्यक्ति परिवर्तन गरेको पीडितका मामा पंकज झाले बताएका छन् ।

धनुषाका एसपी रुगमबहादुर कुँवरले घटनास्थल निरीक्षण गर्दा यो आत्महत्या नभई हत्याको शंका लागेको बताएका छन् । प्रहरीको प्रारम्भिक अनुसन्धानले घटनालाई शंकास्पद मानेको छ । पीडित परिवारले प्रशान्त मिश्रासहित डा. धीरज झा, मिश्राकी बहिनी र भिनाजुलाई प्रमाण नष्ट गर्न सहयोग गरेको आरोप लगाएका छन् । घटना लगत्तै माइतीलाई जानकारी दिनुको साटो पर्साहीबाट टिपरमा मानिसहरू बोलाएर प्रमाण नष्ट गरेको छिमेकीहरूको दाबी छ । परिवारजनले जिल्ला प्रहरी कार्यालय धनुषामा किटानी जाहेरी दर्ता गराएका छन् । एसपी कुँवरको निरीक्षण क्रममा आक्रोशित भीडले आरोपी मिश्राका बुबा रुद्र प्रकाश मिश्रालाई लखेटेका थिए । प्रहरीले घटनाको सूक्ष्म जाँच गरी न्याय दिनुपर्ने माग गर्दै परिवारले गुहार मागेका छन् । यो घटनाले स्थानीय क्षेत्रमा त्रास फैलाएको छ ।