चन्द्रनगरमा मोटरसाइकल चोरी गर्ने युवक पक्राउ, घटना भएको केही मिनेटमै प्रहरीले पक्राउ गर्यो
3 दिन पहिले प्रकाशित
जनकपुरधाम,मंसिर १२ गते । सर्लाहीको चन्द्रनगर गाउँपालिकामा बिहीबार बिहान चोरी भएको मोटरसाइकलसहित फरार एक युवकलाई प्रहरीले तत्कालै पक्राउ गरेको छ। चन्द्रनगर–७ नाढी टोलका रोहन कापरको प्रदेश २–०३–०११ प. ९१३० नम्बरको मोटरसाइकल चन्द्रनगर–६ लोदवा टोलबाट चोरी भएको थियो। ब्रह्मपुरी–पडरिया जन्तीबाट फर्किने क्रममा कापर शौचका लागि मोटरसाइकल रोकेर हिँडेका बेला बिहान साढे ४ बजेतिर मोटरसाइकल चोरी भएको हो।
उक्त मोटरसाइकल चोरेर भाग्दै गरेका चन्द्रनगर–३ कोरियाही टोलका २५ वर्षीय बिनकुमार महतो इलाका प्रहरी कार्यालय केशरगन्जको टोलीद्वारा पक्राउ परेका छन्। प्रहरी निरीक्षक नितेशकुमार सिंहका अनुसार महतोलाई मोटरसाइकल चोरीमा संलग्न ठहर गर्दै थप अनुसन्धानका लागि हिरासतमा राखिएको छ। पछिल्ला दिनमा क्षेत्रभर मोटरसाइकल चोरीका घटनामा वृद्धि भइरहेको बेला चन्द्रनगरमा भने चोरी भएको केही मिनेटमै अभियुक्त पक्राउ परेपछि स्थानीयले राहत महसुस गरेका छन्।
कमेन्ट गर्नुहोस्
view comments