नेपालले बंगलादेशलाई विद्युत् निर्यात बढाएर ६० मेगावाट पु¥याउने, ऊर्जा सहकार्यमा विभिन्न सहमति

काठमाडौँ,मंसिर १२ गते । नेपालले बंगलादेशलाई निर्यात गर्दै आएको विद्युत् ४० मेगावाटबाट बढाएर ६० मेगावाट पु¥याउने भएको छ । नेपाल–बंगलादेश ऊर्जा सचिवस्तरीय संयुक्त निर्देशन समितिको सातौँ बैठकपछि थप २० मेगावाट विद्युत् निर्यात गर्ने सहमति भएको हो । ऊर्जा, जलस्रोत तथा सिँचाइ मन्त्रालयका सचिव चिरञ्जीवी चटौत र बंगलादेशका ऊर्जा तथा खनिज मन्त्रालयकी सचिव फर्जाना ममताजबीच भएको बैठकले विद्युत् व्यापार, जलविद्युत् आयोजना विकास तथा अन्तरदेशीय प्रसारण लाइन विस्तार सम्बन्धी विभिन्न विषयमा सहमति गरेको छ । हाल नेपालले भारतीय प्रसारण लाइन प्रयोग गर्दै बंगलादेशलाई ४० मेगावाट विद्युत् पठाउँदै आएको छ र थप २० मेगावाट पनि त्यही मार्ग हुँदै निर्यात हुनेछ । बंगलादेशका बरापुकारया, पञ्चगढ÷ठाकुरगाउँ, भेरामारा र कोमिल्ला सब–स्टेसनसम्म भारतीय ग्रिडमार्फत विद्युत् पु¥याउने विषयमा दुवै पक्षले अध्ययन गर्ने निर्णय पनि भएको छ ।

बैठकले दुई देशबीच विद्युत् व्यापार र ऊर्जा क्षेत्रको सहकार्यबारे ६ बुँदे सहमति गरेको छ । सुनकोशी–३ जलविद्युत् आयोजनामा लगानी अघि बढाउन बंगलादेशले मूल्यांकनका लागि विशेषज्ञ समिति गठन गर्दै प्रक्रिया अघि बढाउने छ । नवीकरणीय ऊर्जा तथा ऊर्जा दक्षता प्रवद्र्धन सम्बन्धी समझदारीपत्रमा दुवैले आ–आफ्नो प्रक्रिया पूरा गरी छिट्टै हस्ताक्षर गर्ने भएका छन् । यसअन्तर्गत बंगलादेशले नेपाललाई ऊर्जा परीक्षण, ईभी चार्जिङ, रूफटप सोलार जस्ता क्षेत्रमा प्राविधिक सहयोग प्रदान गर्नेछ । क्षमता अभिवृद्धि कार्यक्रम सञ्चालन गर्ने क्रममा पहिलो चरणमा बंगलादेशी टोलीका लागि तालिम काठमाडौंमा र त्यसपछि नेपाली टोलीका लागि बंगलादेशमा सञ्चालन गरिनेछ । नेपाल–भारत–बंगलादेश त्रिदेशीय ऊर्जा सहकार्य सम्बन्धी समझदारीपत्र (एमओयू) मा भारतको सहमति लिन दुवै देशले संयुक्त पहल गर्ने भएका छन् ।