स्वास्थ्यकर्मीलाई आन्दोलन अन्त्य गरी सेवामा फर्कन निजी अस्पताल संघको आग्रह

जनकपुरधाम, कार्तिक २० गते । एशोसिएशन अफ प्राइभेट हेल्थ इन्स्टिच्युसन अफ नेपाल (APHIN) ले आन्दोलनरत स्वास्थ्यकर्मीहरूलाई सेवाको संवेदनशीलता मनन गरी काममा फर्कन आग्रह गरेको छ। संघले बिहीबार जारी गरेको विज्ञप्तिमा मधेश प्रदेशका निजी अस्पतालहरू सामाजिक–आर्थिक अवस्थालाई केन्द्रमा राखी सुलभ शुल्कमा गुणस्तरीय सेवा सञ्चालन गर्दै आएको उल्लेख गर्दै स्वास्थ्यकर्मीहरूको महत्वपूर्ण भूमिकालाई प्रशंसा गरेको छ।

विज्ञप्तिमा संघीय स्वास्थ्य तथा जनसंख्या मन्त्रालयको २०८२ कात्तिक १६ गतेको निर्णय अनुसार प्रा. डा. श्रीकृष्ण श्रेष्ठको संयोजकत्वमा गठन गरिएको समितिले एक महिनाभित्र अस्पताल वर्गीकरण र पारिश्रमिकसम्बन्धी कार्ययोजना तयार गर्ने भनिएकाले सो निर्णयको प्रतिक्षा गर्न आग्रह गरिएको छ। संघका अध्यक्ष डा. एस.के. सिंह र सचिव हरिश्चन्द्र यादवले संयुक्त रूपमा जारी गरेको विज्ञप्तिमा स्वास्थ्यकर्मीहरूको सम्मानजनक पारिश्रमिक माग स्वाभाविक रहेको जनाउँदै आपसी छलफल र समन्वयबाट समस्या समाधान गर्न सुझाव दिइएको छ।