मधेश प्रदेशको बजेट खर्च न्यून : पहिलो त्रैमासमा जम्मा ३.५ प्रतिशत, राजस्व भने २.४२ अर्ब नाघ्यो

जनकपुरधाम, कार्तिक २० गते ।  चालु आर्थिक वर्ष २०८२/८३ को पहिलो त्रैमासमा मधेश प्रदेश सरकारले कुल बजेटको साढे ३ प्रतिशत मात्र खर्च गर्न सफल भएको छ। प्रदेश लेखा नियन्त्रक कार्यालयका अनुसार ४६ अर्ब ९८ करोडको बजेटमध्ये साउनदेखि असोजसम्म चालु र पुँजीगत गरी १ अर्ब ६४ करोड २८ लाख मात्र खर्च भएको छ। चालुतर्फ १ अर्ब २८ करोड ४२ लाख र पुँजीगततर्फ ३५ करोड ८५ लाख खर्च भएकोमा प्रदेश लोकसेवा आयोगले सबैभन्दा बढी १५.१९ प्रतिशत (१ करोड ५९ लाख) खर्च गरेको छ। प्रदेशसभाले १४.१४ प्रतिशत, नीति तथा योजना आयोगले १२.७७ प्रतिशत र अर्थ मन्त्रालयले ११.१७ प्रतिशत खर्च गरेको छ भने खेलकुद तथा समाज कल्याण मन्त्रालयले सबैभन्दा कम ०.४२ प्रतिशत मात्र खर्च गर्न सकेको छ। जेनजी आन्दोलन, चाडपर्व र सरकार विस्तारको ढिलाइले खर्च न्यून भएको अर्थ मन्त्रालयका प्रवक्ता अंशुकुमार झाले बताए।

यसैबीच, प्रदेश सरकारले पहिलो त्रैमासमै २ अर्ब ४२ करोड ६४ लाखभन्दा बढी राजस्व सङ्कलन गरेको छ, जुन खर्चभन्दा बढी हो। साउनमा २७ करोड ८ लाख, भदौमा १ अर्ब १३ करोड ३० लाख र असोजमा १ अर्ब २ करोड २५ लाख राजस्व उठाइएको छ। २४ शीर्षकबाट सङ्कलित यो राजस्वमा मूल्य अभिवृद्धि कर बाँडफाँटबाट १ अर्ब २३ करोड ७७ लाख, अन्तशुल्कबाट ४५ करोड १४ लाख र सवारी करबाट ५० करोड २३ लाख प्रमुख छन्। व्यवसाय दर्ता दस्तुरबाट १ करोड १५ लाख, यातायातबाट २ करोड ६५ लाख र वन रोयल्टीबाट १ करोड ३३ लाख सङ्कलन भएको छ। यसले प्रदेशको आर्थिक क्रियाकलापमा सकारात्मक संकेत देखाएको छ, तर खर्च वृद्धिका लागि नयाँ सरकारको गतिशीलता आवश्यक रहेको विज्ञहरूको भनाइ छ।