मुखियापट्टी मुसहरनिया गाउँपालिकाको अवैध विद्यालय बन्द गर्ने निर्णय

जनकपुरधाम, चैत १९ गते ।  मुखियापट्टी मुसहरनिया गाउँपालिकाले अनुमतिबिना सञ्चालनमा रहेका निजी तथा संस्थागत विद्यालयहरूलाई बन्द गर्ने निर्णय गरेको छ। स्थानीय सरकार सञ्चालन ऐन २०७४ बमोजिम गाउँपालिकाले आधारभूत तथा माध्यमिक तहको शिक्षा व्यवस्थापनको अधिकार पाएको उल्लेख गर्दै, पटक-पटक आग्रह गर्दा पनि अवैध रूपमा सञ्चालन भइरहेका विद्यालयहरू बन्द नगरेकाले कडाइ गरिएको जनाइएको छ।

गाउँपालिकाको निर्णय अनुसार २०८१ साल चैत १६ गतेको बैठकबाट अवैध विद्यालयहरूमा तालाबन्दी गर्ने निर्णय गरिएको हो। यस निर्णयलाई प्रभावकारी बनाउन अभिभावक, स्थानीय समुदाय, र सरोकारवालाहरूलाई आवश्यक सहयोग गर्न हार्दिक अपिल गरिएको छ। साथै, अवैध विद्यालयहरूमा आफ्ना बालबालिकाको भर्ना नगराउन अभिभावकहरूलाई अनुरोध गरिएको छ। गाउँपालिकाले कानुनी प्रक्रियाअनुसार मात्र विद्यालय सञ्चालन गर्नुपर्नेमा जोड दिँदै शिक्षाको गुणस्तर सुधार गर्न सबैको सहकार्य आवश्यक रहेको बताएको छ।