नेपालमा दुई भारतीय औषधिको बिक्रीवितरणमा रोक

काठमाडौं, चैत ११ गते । नेपाल सरकारले दुई भारतीय कम्पनीका औषधिको बिक्रीवितरणमा रोक लगाएको छ। राष्ट्रिय औषधि प्रयोगशालामा गरिएको परीक्षणमा गुणस्तर न्यून भेटिएपछि औषधि व्यवस्था विभागले भारतको साइकोट्रपिक इन्डिया लिमिटेडले उत्पादन गरेको पिल्प्यान ४० (पेन्टोप्राजोल ट्याब्लेट, ब्याच नम्बर CI643008) तथा एरिस्टो फार्मास्युटिकल्स प्रालिको एसिटप ४० एमजी (पेन्टोप्राजोल, ब्याच नम्बर MPJ233487) औषधि बजारमा बेचबिखन गर्न नपाइने निर्णय गरेको हो।

साइकोट्रपिक इन्डिया लिमिटेडको औषधि नेपालमा शारदा मेड्केयर ट्रेडर्स प्रालि, काठमाडौंले आयात गरेको थियो भने एरिस्टो फार्मास्युटिकल्सको औषधि युनिक ट्रेड लिंक प्रालि, वीरगन्जमार्फत नेपाल भित्रिएको थियो। विभागले यी औषधिहरू बिक्रीवितरण नगर्न, बजारबाट फिर्ता गर्न तथा त्यससम्बन्धी विवरण बुझाउन आयातकर्तालाई निर्देशन दिएको छ। साथै, आमनागरिकलाई यी ब्याचका औषधि प्रयोग नगर्न चेतावनी दिएको छ।