मधेश प्रदेशमा १९ अस्पताल बन्द, स्वास्थ्य मापदण्ड उल्लङ्घनमा कडा कारबाही

जनकपुरधाम, चैत १० गते । मधेश प्रदेशका मुख्यमन्त्री सतिशकुमार सिंहले सर्लाहीको लालबन्दी नगरपालिकास्थित लालबन्दी चोक र नवलपुर चोकमा रहेका २३ वटा स्वास्थ्य संस्थाको अनुगमन गरेका छन्। अनुगमनका क्रममा मापदण्डविपरीत सेवा सञ्चालन गरेको पुष्टि भएपछि १९ अस्पताललाई तत्काल बन्द गर्ने निर्देशन दिइएको छ। सेवा सञ्चालन अनुमतिपत्र नभएका तथा आवश्यक मापदण्ड पूरा नगरेका अस्पताललाई कारबाही गरिएको मुख्यमन्त्री सिंहले बताए।

मुख्यमन्त्री सिंहले स्वास्थ्य सेवामा कुनै पनि प्रकारको लापरवाही सह्य नहुने भन्दै राज्यले निर्धारण गरेका मापदण्डको पूर्ण पालना अनिवार्य रहेको उल्लेख गरे। अनुगमनमा जम्मा दुई संस्थासँग मात्र दुरुस्त अनुमतिपत्र रहेको देखिएको छ भने दुई संस्थालाई नवीकरण गर्न निर्देशन दिइएको छ। सिंहले गुणस्तरीय स्वास्थ्य सेवा सुनिश्चित गर्न सरकार कटिबद्ध रहेको बताउँदै अनियमित स्वास्थ्य सेवा प्रदायकहरूलाई कानुनी कारबाही गरिने चेतावनी दिए। साथै, भविष्यमा यस्ता अनियमितता दोहोरिन नदिन अनुगमन प्रक्रिया निरन्तर जारी राखिने र झन् कडाइ गरिने जानकारी दिए।