एसइई परीक्षामा अनियमितता, चार निरीक्षक र सहायक केन्द्राध्यक्ष जिम्मेवारीबाट हटाइयो

जनकपुरधाम, चैत १० गते । पर्सामा जारी माध्यमिक शिक्षा परीक्षा (एसइई) मा मर्यादाविपरीत गतिविधि गरेको भन्दै चार निरीक्षक र एक सहायक केन्द्राध्यक्षलाई जिम्मेवारीबाट हटाइएको छ। पर्साका प्रमुख जिल्ला अधिकारी गणेश अर्यालको अध्यक्षतामा शनिबार साँझ बसेको एसइई परीक्षा समन्वय समितिको बैठकले उनीहरूलाई हटाउने निर्णय गरेको हो। माइस्थान विद्यापिठ माध्यमिक विद्यालय वीरगन्जका केन्द्राध्यक्ष मुनिलाल कर्णलाई सचेत गराउने, सहायक केन्द्राध्यक्ष जयप्रकाश सर्राफलाई परीक्षा अवधिभर केन्द्र प्रवेशमा रोक लगाउने तथा नेपाल राष्ट्रिय माध्यमिक विद्यालय, मसिहानीका निरीक्षक लालबाबु यादवलाई हटाउने निर्णय भएको छ।

बैठकले नेपाल राष्ट्रिय माध्यमिक विद्यालय, मसिहानी र निचुटा परीक्षा केन्द्रमा अनधिकृत व्यक्तिहरूको प्रवेश देखिएकाले केन्द्राध्यक्षलाई लिखित ध्यानाकर्षण गराउने निर्णय गरेको छ। साथै, सिद्धार्थ माध्यमिक विद्यालय चिनी कारखाना वीरगन्ज परीक्षा केन्द्रका निरीक्षक धमेन्द्र पाण्डे र रामबालक यादवलाई हटाउन निर्देशन दिइएको छ। सुन्दरमल रामकुमार कन्या माध्यमिक विद्यालय वीरगन्ज परीक्षा केन्द्रमा गलत प्रश्नपत्र वितरण भएको भन्दै भविष्यमा यस्ता गल्ती हुन नदिन उपायहरू अवलम्बन गरिने निर्णय भएको छ। प्रश्नपत्र खोल्ने समय परीक्षा सुरू हुन २० मिनेट अघि मात्र तोक्ने व्यवस्था मिलाउन निर्देशन दिइएको प्रमुख जिल्ला अधिकारी अर्यालले जानकारी दिए।