एसईई परीक्षामा ह्वाट्सएपमार्फत् चिट चोराउने दुई निरीक्षक पक्राउ

जनकपुरधाम, चैत ८ गते ।  एसईई परीक्षामा ह्वाट्सएप ग्रुपमार्फत चिट चोराउने कार्यमा संलग्न दुई जना निरीक्षकलाई बारा प्रशासनले आज बिहान पक्राउ गरेको छ। पक्राउ पर्नेमा पन्नादेवी कन्या मावि परीक्षा केन्द्रकी निरीक्षक रञ्जु कुमारी र रनिङ गार्डका रूपमा खटिएका सौरभ रहेका छन्। उनीहरूले गल्ती स्वीकार गरेका छन्, र हाल हिरासतमा राखी कानूनी प्रक्रिया अघि बढाइएको प्रशासनले जनाएको छ।

एसईई परीक्षाको अनुगमनका लागि प्रमुख जिल्ला अधिकारी बसन्त अधिकारी नियमित रूपमा परीक्षा केन्द्रहरूको निरीक्षण गरिरहेका थिए। कलैयाको पन्नादेवी कन्या मावि परीक्षा केन्द्रमा ह्वाट्सएपमार्फत चिट चोर्ने गतिविधि भइरहेको सूचना पाएपछि निगरानी बढाइयो। सोही क्रममा निरीक्षक रञ्जु कुमारी र सौरभलाई रंगेहात पक्राउ गरिएको हो।

प्रमुख जिल्ला अधिकारी अधिकारीका अनुसार उनीहरूले ‘साथी’ नामक ह्वाट्सएप ग्रुप बनाएर प्रश्नपत्रको फोटो खिची समूहमा पठाउने गरेका थिए। सोही ग्रुपबाट प्राप्त उत्तर परीक्षार्थीलाई सार्न दिइने गरेको खुलासा भएको छ। विशेषगरी, निरीक्षक रञ्जु कुमारीले उक्त माध्यमबाट आफ्नी छोरीलाई समेत उत्तर उपलब्ध गराउने गरेको खुलेको छ। पक्राउ परेका दुबैजनालाई आवश्यक कानूनी कारबाही अगाडि बढाइने प्रशासनले जनाएको छ ।