सिराहामा एसईई परीक्षा सुरु भएको २० मिनेटमै प्रश्नपत्र बाहिरियो

जनकपुरधाम, चैत ७ गते ।सिराहा जिल्लामा माध्यमिक शिक्षा परीक्षा (एसईई) को पहिलो दिनमै परीक्षा सुरु भएको २० मिनेटभित्रै प्रश्नपत्र बाहिरिएको छ। लहान नगरपालिका-१९ सोनमती गाढास्थित जनता बनवाली माध्यमिक विद्यालय वर्छवा, कल्याणपुर परीक्षा केन्द्रबाट प्रश्नपत्र लिक भएको खुलेको छ। यस घटनाले परीक्षाको गोपनीयता र मर्यादामा गम्भीर प्रश्न उठाएको छ।

सूत्रका अनुसार निजी विद्यालयहरूको सेटिङमा केन्द्राध्यक्ष तथा प्रहरी प्रशासनको संलग्नतासहित मोबाइल प्रयोग गरी प्रश्नपत्र बाहिरिएको छ। यद्यपि, जिल्ला परीक्षा समन्वय समितिका संयोजक तथा प्रमुख जिल्ला अधिकारी वासुदेव दाहालले परीक्षालाई मर्यादित बनाउन ५० जना डेडिकेटेड कर्मचारी खटाइएको बताएका छन्। उनले परीक्षा मर्यादित रूपमा सञ्चालन भइरहेको दाबी गर्दै प्रश्नपत्र कसरी बाहिरियो भन्नेबारे अनुसन्धान भइरहेको र दोषी उपर कारबाही गरिने बताएका छन्।

यस वर्ष परीक्षा केन्द्रहरूमा मोबाइल तथा चिटिङका अन्य सामग्री प्रयोगमा प्रतिबन्ध लगाइए तापनि प्रश्नपत्र आउट हुनु गम्भीर विषय भएको शिक्षाविद्हरू बताउँछन्। यस घटनाले प्रहरी प्रशासन र केन्द्राध्यक्षहरूकै मिलेमतोमा प्रश्नपत्र बाहिरिएको आशंका जन्माएको छ। हाल जिल्लाका ५० परीक्षा केन्द्रमा १०,७०३ जना विद्यार्थी एसईई परीक्षामा सहभागी रहेका छन्।