राजविराजका अवैध स्वास्थ्य संस्थामाथि मुख्यमन्त्री सिँहको कडा कदम

जनकपुधाम, चैत ३ गते । मधेस प्रदेशका मुख्यमन्त्री सतिशकुमार सिँहले राजविराजस्थित प्रसूति तथा स्त्रीरोग क्लिनिक एन्ड डाइग्नोस्टिक सेन्टरलाई तत्काल बन्द गर्न निर्देशन दिएका छन्। स्वास्थ्य क्लिनिकको अनुमति लिएर पोलिक्लिनिकका रूपमा सेवा सञ्चालन गरिरहेको पाइएको भन्दै मुख्यमन्त्री सिँहले आइतबार अनुगमनपछि कारबाहीको आदेश दिएका हुन्। क्लिनिकले स्थानीय तहबाट अनुमति लिए पनि शय्यासहितको इमेजिङ तथा शल्यक्रिया सेवा दिइरहेको पाइएको छ, जुन पोलिक्लिनिक सञ्चालनका लागि आवश्यक कानुनी मापदण्ड पूरा नगरेको हो।

त्यस्तै, भारती इमेजिङ सेन्टरले अनुमति नलिई सञ्चालन गरिरहेको पाइएकोले मुख्यमन्त्री सिँहले यसलाई पनि बन्द गर्न आदेश दिए। यसबाहेक, स्थानीय तहबाट १५ शय्याको अनुमति लिएर सञ्चालनमा रहेका अनार भुवनेश्वर हस्पिटल प्रालि र सञ्जनदीप हस्पिटललाई दुई महिनाभित्र मापदण्ड पूरा गर्न निर्देशन दिइएको छ। ५० शय्याको युनिक सिटी अस्पताललाई सेवा अनुमतिपत्र नविकरण गर्न भनिएको छ। साथै, २ सय शय्याको छिन्नमस्ता अस्पताललाई सरसफाइमा सुधार गर्नुपर्ने आदेश दिइएको छ।

मुख्यमन्त्री सिँहले संघ सरकार मातहत सञ्चालित गजेन्द्रनारायण सिँह अस्पतालको पनि अनुगमन गरेका छन्, जहाँ आकस्मिक कक्षमा मेडिकल अफिसर नरहेको, अनुमति बिना जनशक्ति अनुपस्थित भएको र ल्याब आम्दानीमा ५० प्रतिशतभन्दा बढी कमी आएको पाइएको छ। उनले अस्पताल सेवामा सुधार, उपकरण अभाव सम्बोधन र जनशक्ति व्यवस्थापनबारे संघीय स्वास्थ्य मन्त्रीसँग छलफल गर्ने प्रतिबद्धता जनाएका छन्।