मुख्यमन्त्री सिंहको अनुगमनले सर्लाहीमा अवैध अस्पताल सञ्चालकहरू फरार

जनकपुरधाम, फागुन १८ गते । मधेश प्रदेशका मुख्यमन्त्री सतिशकुमार सिंहले शनिबार राति सर्लाहीको नवलपुर बजारमा अवैध रूपमा सञ्चालनमा रहेका अस्पतालहरूको अनुगमन गर्दा सञ्चालकहरू फरार भएका छन्। मुख्यमन्त्री सिंहले पूर्व-पश्चिम राजमार्गअन्तर्गत रौतहटको चन्द्रनिगाहपुर र सर्लाहीको हरिवनका विभिन्न अस्पतालहरूको अनुगमनपछि राति ९ बजेपछि लालबन्दी नगरपालिका–१, नवलपुर बजार क्षेत्रमा पुग्नुभएको थियो। अनुगमनको खबर पाएपछि रक्षा हेल्थकेयर, जय भवानी हेल्थकेयर लगायतका अस्पतालका सञ्चालकहरू सटर बन्द गरी फरार भएका थिए, जसका कारण ती अस्पतालहरूको अनुगमन हुन सकेन।

नवलपुरमा भानु अन्जली अस्पताल मात्र खुला अवस्थामा फेला परेको थियो। तर, मापदण्डविपरीत सञ्चालन भइरहेको पाइएकोले मुख्यमन्त्री सिंहले उक्त अस्पताललाई तत्कालै बन्द गर्न निर्देशन दिनुभयो। यसअघि, हरिवनमा स्वाभिमान अस्पतालबाहेक अन्य चारवटा अस्पतालहरूलाई पनि मापदण्ड पूरा नगरेको भन्दै बन्द गर्न निर्देशन दिइएको थियो। मुख्यमन्त्री सिंहको सचिवालयका अनुसार, अनुमति नलिएका तथा मापदण्ड पूरा नगरेका दयन्ती अस्पताल, सर्लाही जीवन हेल्थकेयर, लीलावती अस्पताल र सरस्वती अस्पताललाई तत्काल बन्द गर्न निर्देशन दिइएको छ।

नवलपुर बजार पछिल्लो समय अवैध स्वास्थ्य संस्था सञ्चालन गर्ने थलो बन्दै गएको छ। जिल्ला प्रशासन कार्यालय सर्लाही र लालबन्दी नगरपालिकाले बारम्बार अनुगमन गरी एक दर्जनभन्दा बढी अवैध अस्पताल र क्लिनिक बन्द गर्न निर्देशन दिए पनि त्यसको पालना हुन सकेको छैन। मुख्यमन्त्री सिंहले स्वास्थ्य क्षेत्रमा सुधारको अभियानअन्तर्गत विभिन्न जिल्लामा पुगेर यसरी नै अस्पताल तथा स्वास्थ्य संस्थाहरूको अनुगमन जारी राख्नुभएको छ। यसअघि, जनकपुरधाममा पनि अवैध रूपमा सञ्चालन भइरहेका अस्पतालहरूलाई बन्द गर्न निर्देशन दिइएको थियो।