मधेश कृषि विश्वविद्यालयको तालाबन्दी खोलियो, समस्या समाधानको आश्वासन

जनकपुरधाम, फागुन ११ गते । मधेश कृषि विश्वविद्यालयका उपप्राध्यापक तथा कर्मचारीहरूले बाँकी तलब भुक्तानीलगायत विभिन्न माग राखी १० दिनअघि गरेको तालाबन्दी शनिबार खोलिएको छ। मधेश प्रदेशका मुख्यमन्त्री एवं विश्वविद्यालयका कुलपति शतिश कुमार सिंह स्वयं उपस्थित भई जायज मागहरू सम्बोधन गर्ने आश्वासन दिएपछि आन्दोलनरत पक्षले तालाबन्दी हटाएका हुन्। जिल्ला समन्वय समिति सप्तरीको अगुवाइमा बसेको सर्वपक्षीय बैठकमा तलब उपलब्ध गराउने र विश्वविद्यालयका अन्य समस्या समाधानका लागि सिनेट बैठकबाट निर्णय गर्ने सहमति भएपछि तालाबन्दी खोलिएको हो।

उक्त बैठकमा मुख्यमन्त्री सिंहसहित कृषि विश्वविद्यालयका रजिष्ट्रार भगवान ठाकुर, राजविराज नगरपालिकाका कार्यवाहक नगर प्रमुख इसरत परवीन, रुपनी गाउँपालिका अध्यक्ष दिनेश कुमार यादव, प्रमुख जिल्ला अधिकारी भोला दाहाल, प्रहरी उपरीक्षक ढकेन्द्र खतिवडा तथा विभिन्न राजनीतिक दलका प्रतिनिधिहरूको सहभागिता रहेको जिल्ला समन्वय समिति सप्तरीका प्रमुख शिवनारायण साहले जानकारी दिनुभयो। बैठकमा विश्वविद्यालयका उपप्राध्यापक एवं कर्मचारीहरूको बाँकी तलब वैकल्पिक व्यवस्था गरी उपलब्ध गराउने तथा यसका लागि मधेश प्रदेशको शिक्षा तथा संस्कृति मन्त्रालयलाई पत्राचार गर्ने निर्णय गरिएको छ। साथै, विश्वविद्यालयका अन्य समस्या समाधान गर्न यथाशीघ्र सिनेट बैठक बोलाउने निष्कर्ष निकालिएको छ।

तालाबन्दी हटेपछि फागुन ११ गते आइतबारदेखि पठन-पाठन सुचारु हुने भएको छ। मुख्यमन्त्री सिंहले फागुन २० गते बस्ने सिनेट बैठकमार्फत समस्या समाधानका लागि ठोस निर्णय लिने प्रतिबद्धता जनाएका छन्। विगत सात महिनादेखि तलब तथा अन्य सुविधा नपाएको भन्दै उपप्राध्यापक तथा कर्मचारीहरूले फागुन १ गतेदेखि विश्वविद्यालयको शैक्षिक तथा प्रशासनिक कार्य रोक्न तालाबन्दी गरेका थिए, जसका कारण सम्पूर्ण शैक्षिक गतिविधि ठप्प भएका थिए।