जनकपुरका निजी अस्पतालमा बिना एनेस्थेसिया शल्यक्रिया, बिरामीको ज्यान जोखिममा

जनकपुरधाम, फागुन ११ गते । मधेश प्रदेशका मुख्यमन्त्री सतीशकुमार सिंहले जनकपुरका केही निजी अस्पतालमा बिना एनेस्थेसिया डाक्टर नै शल्यक्रिया भइरहेको खुलासा गर्नुभएको छ। अनुगमनका क्रममा आवश्यक दक्ष एनेस्थेसियोलोजिस्टको अभावमा शल्यक्रिया सञ्चालन भइरहेको पाइएको उहाँले बताउनुभयो। यसले बिरामीको स्वास्थ्य गम्भीर जोखिममा परेको भन्दै उहाँले तत्काल कडा नियमन गर्ने प्रतिबद्धता जनाउनुभएको छ।

मुख्यमन्त्री सिंहका अनुसार जनकपुरका अधिकांश निजी अस्पतालहरूमा दुई–चार महिना मात्र तालिम लिएका सहायकहरूले शल्यक्रिया गरिरहेका छन्। अनुगमनका क्रममा विभिन्न अस्पतालमा शल्यक्रियाको जिम्मा लिने भनिएका डाक्टरहरू अनुपस्थित रहेको र सहायक कर्मचारीलाई जिम्मेवारी सुम्पिएको भेटिएको उहाँले जानकारी दिनुभयो। नेपाल स्वास्थ्य व्यवसाय परिषद्का अनुसार एमडी चिकित्सकले मात्र एनेस्थेसिया दिन पाउने कानुनी प्रावधान छ। तर, जनकपुरका ठूला भनिएका अस्पतालहरूले समेत बिरामीसँग शुल्क लिएर सहायकमार्फत शल्यक्रिया गरिरहेको आरोप छ।

मुख्यमन्त्री सिंहले गैरकानुनी रूपमा सञ्चालनमा रहेका अस्पतालहरू बन्द गर्न निर्देशन दिनुभएको छ। अनुगमनका क्रममा मुस्कान हस्पिटल जस्ता केही अस्पतालहरू दर्ताबिना नै सञ्चालनमा रहेको भेटिएको थियो। हालसम्म जनकपुरका ८० निजी अस्पतालमध्ये ४० वटा अस्पतालको निरीक्षण गरिसकिएको छ, जसमा आधाभन्दा बढी मापदण्डविपरीत सञ्चालनमा रहेको पाइएको छ। मुख्यमन्त्री सिंहले अब बाँकी अस्पतालहरूको पनि निरीक्षण गरी अवैध रूपमा सञ्चालन भएका अस्पतालमाथि कडा कारबाही गरिने बताउनुभएको छ।