तलब नपाएपछि मधेश कृषि विश्वविद्यालयमा तालाबन्दी

जनकपुरधाम, फागुन १ गते । पछिल्लो छ महिनादेखि तलबभत्ता नपाएको भन्दै मधेश कृषि विश्वविद्यालयका उपप्राध्यापक तथा कर्मचारीहरूले बिहीबार प्रशासनिक भवनमा तालाबन्दी गरेका छन्। विरोधका क्रममा उपकुलपति डा. वैधनाथ महतोलाई बाहिर निकालेर विश्वविद्यालयका विभिन्न शाखा तथा प्रवेशद्वार बन्द गरिएको छ। कर्मचारीहरूले नियमअनुसारको तलबभत्ता, क्षतिपूर्ति तथा अन्य सुविधाको माग गरेका छन्। तर, प्रदेश सरकारका शिक्षा तथा संस्कृतिमन्त्री रानी शर्मा तिवारीलाई पटक–पटक ज्ञापनपत्र बुझाउँदा पनि कुनै सुनुवाइ नभएको उनीहरूको गुनासो छ।

विश्वविद्यालयको वार्षिक नीति तथा कार्यक्रम पारित नहुँदा आर्थिक संकट चुलिएको छ, जसले गर्दा वित्तीय कारोबार रोकिएको छ। जनता समाजवादी पार्टी (जसपा) र जनमत पार्टीबीचको राजनीतिक विवादले पनि विश्वविद्यालयलाई प्रभावित पार्दै भवन निर्माण कार्य समेत ठप्प बनाएको छ। २०८० माघ ८ गते जसपा अध्यक्ष उपेन्द्र यादवलाई प्रमुख अतिथि बनाएर शिलान्यास कार्यक्रम तय गरिएपछि असन्तुष्ट बनेको जनमत पार्टीले तालाबन्दी गरेको थियो। यसै कारण प्रदेश सरकारबाट आफ्ना मन्त्रीहरू फिर्ता बोलाएको जनमत पार्टीको कदमले समस्या झन् जटिल बनेको छ। आर्थिक अभावकै कारण नयाँ भर्ना प्रक्रिया पनि प्रभावित भएको छ।