मुख्यमन्त्री सिंहद्वारा जनकपुरधामका अस्पतालहरूको अनुगमन, अवैध सञ्चालनमा कडाइ

जनकपुरधाम, माघ २७ गते । मधेश प्रदेशका मुख्यमन्त्री सतीशकुमार सिंहले शनिबार जनकपुरधामका विभिन्न निजी अस्पतालहरूको अनुगमन गरेका छन्। बिरामीहरूको बढ्दो गुनासोका कारण स्वास्थ्य तथा जनसंख्या मन्त्रालयको टोलीसहित गरिएको अनुगमनमा जनकपुर ग्रान्डी अस्पताल, साई मल्टिस्पेसियालिटी हस्पिटल एन्ड ट्रमा सेन्टर, रामा मेमोरियल हस्पिटल एन्ड रिसर्च सेन्टर प्रालि, र समर हस्पिटल एन्ड रिसर्च सेन्टर समावेश थिए। अनुगमनका क्रममा मुख्यमन्त्री सिंहले बिना अनुमति सञ्चालनमा रहेका अस्पतालहरूलाई तत्काल बन्द गर्न निर्देशन दिए। उनले स्वास्थ्य सेवा जस्तो संवेदनशील क्षेत्रमा लापरबाही स्वीकार्य नभएको बताउँदै, दर्ता प्रक्रिया पूरा नगरेका अस्पतालहरूले बिरामीलाई सुरक्षित स्थानमा सार्नुपर्नेमा जोड दिए।

मुस्कान अस्पतालमा लापरबाहीपछि मुख्यमन्त्रीको कारबाही, अस्पताल बन्द

जनकपुरधामको मुस्कान अस्पतालमा पित्तथैलीको शल्यक्रियापछि बिरामीको २० दिनसम्म होश नआएको घटनापछि मुख्यमन्त्री सिंहले अस्पतालमा अनुगमन गरे। अनुगमनका क्रममा अस्पतालले आवश्यक स्वीकृति नलिएको र मापदण्ड पूरा नगरेको पाइएको थियो। त्यसपछि मुख्यमन्त्री सिंहले अस्पताल तत्काल बन्द गरी साँचो सरकारलाई बुझाउन निर्देशन दिए। यस कदमले जनकपुरधामका अन्य अवैध रूपमा सञ्चालन भइरहेका अस्पतालहरूलाई पनि कारबाहीको दायरामा ल्याउने संकेत गरेको छ।