"मधेश प्रदेशमा पाठेघर क्यान्सरविरुद्धको निःशुल्क एचपिभी खोप अभियान सुरू"

जनकपुरधाम, माघ २३ गते ।  विश्व क्यान्सर दिवसको अवसरमा मधेश प्रदेशमा पाठेघर क्यान्सरविरुद्धको निःशुल्क एचपिभी खोप अभियान सुरू गरिएको छ। जनकपुरधामबाट औपचारिक रूपमा उद्घाटन गरिएको यस अभियानको शुभारम्भ स्वास्थ्य तथा जनसंख्या मन्त्री शत्रुधन प्रसाद सिंहले स्वास्थ्य कार्यालय धनुषाका प्रमुख उमेश यादवलाई खोपको किट हस्तान्तरण गर्दै गरे। कार्यक्रममा १० देखि १४ वर्ष उमेर समूहका पाँच किशोरीलाई खोप लगाइएको थियो।

मन्त्री सिंहका अनुसार नेपालमा पाठेघर क्यान्सरका कारण दैनिक चार महिलाको मृत्यु हुने भएकाले यो खोप अभियान महत्त्वपूर्ण छ। महँगो मानिएको एचपिभी खोपलाई सरकारले निःशुल्क उपलब्ध गराएकाले सबै लक्षित किशोरीहरूले अनिवार्य रूपमा लगाउनुपर्ने उनले बताए। स्वास्थ्य मन्त्रालयका निमित्त सचिव राजेश मिश्रले व्यक्तिगत अनुभव साझा गर्दै कुनै पनि किशोरी खोपबाट वञ्चित हुनु नहुनेमा जोड दिए।

स्वास्थ्य निर्देशनालय मधेश प्रदेशका निर्देशक श्रवण कुमार नायकका अनुसार प्रदेशभर १३६ पालिकामा ३ लाख ६९ हजार १२४ किशोरीलाई खोप दिने लक्ष्य राखिएको छ, जसमा विद्यालय बाहिर रहेका ७५ हजार २११ किशोरीसमेत समेटिनेछन्। जिल्ला स्वास्थ्य कार्यालय धनुषाका प्रमुख उमेश यादवका अनुसार फागुन ६ गतेसम्म १० देखि १४ वर्ष उमेर समूहका तथा कक्षा ६ देखि १० सम्म अध्ययनरत किशोरीहरूलाई खोप लगाइनेछ।