सामुदायिक विद्यालयमा नि:शुल्क शुद्ध खानेपानी उपलब्ध गराइने

जनकपुरधाम, माघ २१ गते । खानेपानीमन्त्री प्रदीप यादवले देशभरका सामुदायिक विद्यालयमा नि:शुल्क रूपमा शुद्ध तथा सफा खानेपानी जडान तथा वितरण गरिने घोषणा गरेका छन्। वीरगञ्ज महानगरपालिका–१३, राधेमाईस्थित साउथ जोन सेकेन्डरी स्कूलको १६औँ वार्षिकोत्सव समारोहमा बोल्दै उनले विद्यालयहरूमा चाँडोभन्दा चाँडो खानेपानीका धारा जडान तथा वितरण कार्य सुरु गर्न गृहकार्य भइरहेको बताए। उनका अनुसार, अब सामुदायिक विद्यालयमा पानीको पहुँच निःशुल्क रूपमा उपलब्ध गराइनेछ, जसका लागि कुनै शुल्क लाग्ने छैन।

मन्त्री यादवले शिक्षा मन्त्रालयसँग समन्वय गरी यो अभियानलाई अघि बढाइरहेको जानकारी दिए। यो कार्यलाई प्रभावकारी बनाउन खानेपानी मन्त्रालय र शिक्षा मन्त्रालयका सहसचिवको नेतृत्वमा विशेष टोली गठन गरिएको छ, जसले आवश्यक तयारी तथा रणनीति निर्माण गरिरहेको छ। साथै, उनले आगामी एक वर्षभित्र शुद्ध खानेपानीको उपलब्धता २७ प्रतिशतबाट ५७ प्रतिशतसम्म पुर्‍याउने लक्ष्य राखिएको बताए। सरकारको यस योजनाले विद्यार्थीहरूलाई स्वास्थ्यकर वातावरण प्रदान गर्दै शिक्षा क्षेत्रमा सकारात्मक प्रभाव पार्ने विश्वास गरिएको छ।